अभयसिंह जगताप यांच्या वाढदिवसानिमित्त भव्य राज्यस्तरीय कुस्ती स्पर्धेचे आयोजन
खटाव प्रतिनिधी
माण तालुक्यातील वरकुटे मलवडी येथे दिनांक २० व २१ मे रोजी भव्य राज्यस्तरीय कुस्ती स्पर्धेचे आयोजन करण्यात आले असून परिसरात कुस्तीप्रेमींमध्ये उत्साहाचे वातावरण निर्माण झाले आहे.
महाराष्ट्र प्रदेश राष्ट्रवादी युवक काँग्रेसचे सरचिटणीस तसेच माण-खटाव राष्ट्रवादी काँग्रेसचे विधानसभा अध्यक्ष अभयसिंह जगताप यांच्या वाढदिवसानिमित्त “अभय दादा केसरी” या राज्यस्तरीय कुस्ती स्पर्धेचे आयोजन करण्यात आले आहे. या स्पर्धा सलग चौथ्या वर्षी आयोजित केल्या जात असून महाराष्ट्र राज्य कुस्तीगीर संघटना आणि सातारा जिल्हा कुस्तीगीर संघटना यांच्या मान्यतेने स्पर्धा पार पडणार आहेत.
राज्यातील नामांकित मल्ल या स्पर्धेत सहभागी होणार असून दोन दिवस कुस्तीचा थरार अनुभवायला मिळणार आहे. ग्रामीण भागातील पारंपरिक कुस्तीला चालना मिळावी आणि नवोदित मल्लांना व्यासपीठ उपलब्ध व्हावे, या उद्देशाने या स्पर्धेचे आयोजन करण्यात आल्याची माहिती आयोजकांकडून देण्यात आली.
स्पर्धा यशस्वी करण्यासाठी स्थानिक कार्यकर्ते आणि ग्रामस्थांकडून जोरदार तयारी सुरू असून मोठ्या प्रमाणात प्रेक्षक उपस्थित राहण्याची शक्यता व्यक्त केली जात आहे.
