महाबळेश्वर : प्रतिनिधी
थंड हवेचे पर्यटनस्थळ म्हणून प्रसिद्ध असलेल्या महाबळेश्वर येथे उन्हाळी सुट्टीमुळे पर्यटकांची मोठ्या प्रमाणात गर्दी होत आहे. वाढत्या गर्दीच्या पार्श्वभूमीवर वाहतूक व्यवस्था सुरळीत राहावी आणि अपघातांना आळा बसावा यासाठी महाबळेश्वर पोलिसांनी नियमभंग करणाऱ्या वाहन चालकांविरोधात दंडात्मक कारवाईचा बडगा उगारला आहे.
वाहन चालक तसेच मोटारसायकलस्वारांनी वाहतूक नियमांचे पालन करावे, शिस्त लागावी आणि कायद्याचे उल्लंघन रोखले जावे या उद्देशाने शहरातील विविध ठिकाणी विशेष मोहीम राबविण्यात येत आहे.
याच मोहिमेअंतर्गत शिवाजी महाराज चौक येथे कार्यरत पोलीस हवालदार विजय ढवळे आणि संदीप वाघमारे यांनी कारवाई करत मोटारसायकलस्वारावर विनापरवाना वाहन चालवणे तसेच ट्रिपल सीट प्रवास केल्याप्रकरणी गुन्हा दाखल करून दंडात्मक कारवाई केली.
पर्यटकांनी आणि नागरिकांनी वाहतूक नियमांचे पालन करून पोलिस प्रशासनाला सहकार्य करावे, असे आवाहन पोलिसांकडून करण्यात आले आहे.
