अतिवृष्टी, चक्रीवादळे आणि ‘एल निनो’ संकटाच्या पार्श्वभूमीवर आपत्ती व्यवस्थापनावर भर
सिंधुदुर्ग | प्रतिनिधी
आगामी मान्सून हंगाम, संभाव्य अतिवृष्टी, चक्रीवादळे आणि ‘एल निनो’च्या पार्श्वभूमीवर सिंधुदुर्ग जिल्हा प्रशासनाने अधिक सतर्क राहून आपत्ती व्यवस्थापनाची प्रभावी तयारी करावी, अशा सूचना सिंधुदुर्गचे पालकमंत्री नितेश राणे यांनी दिल्या.
जिल्हास्तरीय मान्सूनपूर्व तयारी आढावा बैठकीत ते बोलत होते. यावेळी जिल्हाधिकारी तुळशी थडीमसे, मुख्य कार्यकारी अधिकारी स्वेंद्र खेबुडकर, जिल्हा बँक अध्यक्ष मनीष दळवी यांच्यासह विविध विभागांचे अधिकारी उपस्थित होते.
बैठकीदरम्यान पालकमंत्र्यांनी घाटमाथा व दरडप्रवण क्षेत्रांवर विशेष लक्ष केंद्रित करण्याच्या सूचना दिल्या. घाट रस्त्यांवर सुरक्षेसाठी संरक्षक जाळ्या उभारणे, तसेच पावसाळ्यात धोका निर्माण करणारी झाडे आधीच हटवण्याचे आदेश त्यांनी संबंधित यंत्रणांना दिले.
पूरप्रवण गावांमध्ये तातडीच्या बचावकार्यासाठी बोटींची संख्या वाढवण्यास सांगत प्रशासनाच्या सज्जतेची चाचणी घेण्यासाठी मॉक ड्रिल आयोजित करण्याचे निर्देशही त्यांनी दिले. नागरिकांना आपत्कालीन संपर्क क्रमांक उपलब्ध करून देणे, तसेच आरोग्य विभागाने औषधसाठ्यासह साथीच्या आजारांना सामोरे जाण्यासाठी सज्ज राहण्याची आवश्यकता त्यांनी अधोरेखित केली.
वादळी पावसात वीजपुरवठा खंडित होणार नाही यासाठी महावितरणने विशेष दक्षता घ्यावी, असे सांगताना आंबोलीसारख्या पर्यटनस्थळांवर पर्यटकांच्या सुरक्षेसाठी स्थानिक प्रशासन, पोलीस आणि पर्यटन विभागाने समन्वयाने काम करण्याच्या सूचना त्यांनी दिल्या. धोकादायक ठिकाणी पर्यटकांना जाण्यापासून रोखण्यासाठी प्रभावी उपाययोजना करण्याचेही निर्देश देण्यात आले.
नद्यांमधील गाळ काढण्याच्या कामांना गती देण्याचे आदेश देत, मान्सून काळात कोणतीही जीवित किंवा वित्तहानी होऊ नये यासाठी सर्व विभागांनी सतर्कतेने आणि समन्वयाने काम करावे, असे आवाहन पालकमंत्री नितेश राणे यांनी केले.
