कोरेगाव | प्रतिनिधी
कोरेगाव शहरातील एका चायनिज हॉटेलमध्ये ट्रिपल राईसची ऑर्डर वेळेत न मिळाल्याच्या कारणावरून झालेल्या वादाचे रूपांतर थेट हाणामारीत झाले. या घटनेत हॉटेल चालक जखमी झाला असून, कोरेगाव पोलीस ठाण्यात संबंधितांविरोधात गुन्हा दाखल करण्यात आला आहे.
मिळालेल्या माहितीनुसार, ही घटना १४ मे रोजी रात्री सुमारे आठ वाजण्याच्या दरम्यान जैन मंदिराशेजारील एका चायनिज हॉटेलमध्ये घडली. काही ग्राहकांनी ट्रिपल राईसची ऑर्डर दिली होती. मात्र, ऑर्डर तयार होण्यासाठी थोडा वेळ लागेल, असे हॉटेल चालकाने सांगितल्याने ग्राहक संतापले.
यानंतर दोन्ही बाजूंमध्ये शाब्दिक वाद सुरू झाला आणि काही वेळातच त्याचे रूपांतर हाणामारीत झाले. यावेळी चाकू व लाकडी दांडक्याने हल्ला करण्यात आल्याचे समोर आले आहे. या मारहाणीत हॉटेल चालक जखमी झाला.
तसेच हॉटेलच्या गल्ल्यातील काही रक्कम गहाळ झाल्याचाही आरोप करण्यात आला आहे. घटनेची माहिती मिळताच पोलिसांनी घटनास्थळी धाव घेत परिस्थिती नियंत्रणात आणली. संबंधितांविरोधात गुन्हा दाखल करण्यात आला असून पुढील तपास कोरेगाव पोलीस करत आहेत.
