भडगाव | प्रतिनिधी
पंतप्रधान Narendra Modi यांनी केलेल्या इंधन बचतीच्या आवाहनाला प्रतिसाद देत भडगाव क्रिकेट अकॅडमीतर्फे आयोजित करण्यात आलेली जनजागृतीपर सायकल रॅली रविवारी उत्साहात पार पडली. प्रा. डॉ. दिनेश तांदळे यांच्या मार्गदर्शनाखाली तसेच रवींद्र वाडेकर आणि परिक्षीत पाटील यांच्या परिश्रमातून या उपक्रमाचे आयोजन करण्यात आले होते.
इंधन बचत, पर्यावरण संरक्षण आणि निरोगी आरोग्याचा संदेश देण्यासाठी आयोजित करण्यात आलेल्या या रॅलीला नागरिकांचा उत्स्फूर्त प्रतिसाद मिळाला. रॅलीमध्ये भडगाव क्रिकेट अकॅडमीचे खेळाडू तसेच विविध क्षेत्रातील मान्यवरांनी सहभाग नोंदविला.
यामध्ये डॉ. निलेश पाटील, विजय देशपांडे, जाकीर दादा कुरेशी, प्राध्यापक दीपक मराठे, रावसाहेब पाटील, डॉ. हेमंत पाटील, सुरेशजी भंडारी, चेतन रंगनाथ पाटील यांच्यासह अनेक नागरिक सहभागी झाले होते.
सकाळी आझाद चौक येथून सायकल रॅलीला प्रारंभ करण्यात आला. त्यानंतर नगर पालिका परिसर, मेन रोड, महात्मा फुले चौक, डॉ. बाबासाहेब आंबेडकर चौक, छत्रपती शिवाजी महाराज चौक, महाराणा प्रताप चौक मार्गे तहसील कार्यालय येथे रॅलीचा समारोप करण्यात आला.
यावेळी आयोजकांनी नागरिकांना दैनंदिन जीवनात शक्य तितका सायकलचा वापर करण्याचे आवाहन केले. इंधन बचतीसोबतच पर्यावरण संवर्धन आणि आरोग्य संवर्धनासाठी सायकलचा वापर महत्त्वाचा असल्याचे त्यांनी सांगितले.
कार्यक्रम यशस्वी करण्यासाठी भडगाव क्रिकेट अकॅडमीच्या सदस्यांनी विशेष परिश्रम घेतले.
