खटाव प्रतिनिधी
खटाव तालुक्यातील मायणी परिसरात बिबट्याचा वावर वाढल्याने नागरिकांमध्ये भीतीचे वातावरण निर्माण झाले आहे. भिशे वस्ती, शिंदेवाडी आणि बदाचा मळा परिसरात गेल्या काही दिवसांपासून बिबट्याची हालचाल दिसून येत असून, स्थानिक शेतकरी आणि ग्रामस्थांना प्रत्यक्ष बिबट्याचे दर्शन झाल्याने चिंता वाढली आहे.
वन विभागाने या घटनेची गंभीर दखल घेत नागरिकांना सतर्कतेचा इशारा दिला आहे. स्वतःच्या तसेच पाळीव प्राण्यांच्या सुरक्षेसाठी काळजी घेण्याचे आवाहन करण्यात आले आहे.
घटनास्थळावरून मिळालेल्या माहितीनुसार, गेल्या काही दिवसांपासून मायणी परिसरात बिबट्या आल्याची चर्चा सुरू होती. मात्र, प्रत्यक्ष दर्शन कोणालाही झाले नव्हते. शुक्रवारी रात्री सुमारे ११.४५ वाजण्याच्या सुमारास मायणी शिंदेवाडी येथील अविनाश शिंदे, संदीप शिंदे आणि लक्ष्मण काळे या युवकांना बिबट्या दिसून आला. त्यांनी त्याचा व्हिडिओ आपल्या मोबाईलमध्ये कैद केला असून, तो सोशल मीडियावर व्हायरल झाला आहे.
या घटनेनंतर परिसरातील ग्रामस्थांमध्ये भीतीचे वातावरण पसरले आहे. शेतकरी रात्रीच्या वेळी शेतात जाणे टाळत असून, नागरिकांनी लहान मुलांना आणि जनावरांना एकटे सोडू नये, अशी खबरदारी घेतली जात आहे.
दरम्यान, वन विभागाकडून परिसरात पाहणी सुरू करण्यात आली असून नागरिकांनी अफवांवर विश्वास न ठेवता सतर्क राहावे, असे आवाहन करण्यात आले आहे. तसेच बिबट्याचा वावर दिसल्यास तात्काळ वन विभागाला माहिती द्यावी, असेही सांगण्यात आले आहे.
