लातूर | प्रतिनिधी
लातूर येथील श्री केशवराज मंदिरात दि. २१ ते २३ मे २०२६ दरम्यान पंचकुंडात्मक महाविष्णू याग व पवमान स्वाहाकार महायज्ञाचे आयोजन करण्यात आले आहे. हा धार्मिक विधी श्रीक्षेत्र मोहटादेवीचे प्रधान आचार्य बबनदेव कुलकर्णी यांच्या मार्गदर्शनाखाली संपन्न होणार आहे.
प्रत्येक तीन वर्षांनी येणाऱ्या अधिकमासाच्या निमित्ताने यंदाच्या अधिकमासात पूर्णवादाचार्य सद्गुरु श्री रामचंद्र महाराज पारनेरकर यांच्या शुभाशिर्वादाने व पूर्णवाद वर्धिष्णू विष्णू महाराज पारनेरकर यांच्या प्रेरणेने या धार्मिक सोहळ्याचे आयोजन करण्यात आले आहे.
यज्ञकाळात सामूहिक श्री विष्णू सहस्त्रनाम पठण, सामूहिक श्रीसूक्त पठण व कुंकुमार्चन यासह स्वर्णीनंद ग्रुपकडून गायनसेवा सादर करण्यात येणार आहे. तसेच दररोज सायंकाळी ८ ते ९ या वेळेत भजनसेवा आयोजित करण्यात आली आहे.
या पवित्र काळात श्री केशवराज यांच्या मूर्तीस विष्णू सहस्त्रनामासह तीन दिवसांत एक लाख तुलशी अर्पण करण्यात येणार आहेत. या सोहळ्याचे मुख्य महाप्रसाद यजमान दीपक हरी कोटलवार हे असून, मुख्य तुलशी अर्चना यजमान पापाशेठ ताथवडे परिवार आहेत. मुख्य यज्ञ यजमान म्हणून धर्मवीर भारती कार्यरत आहेत.
या धार्मिक सोहळ्याचे आयोजन केशवराज मंदिर संस्थानच्या वतीने करण्यात आले असून, भाविक भक्तांनी मोठ्या संख्येने उपस्थित राहून दर्शन व महाप्रसादाचा लाभ घ्यावा, असे आवाहन विश्वस्त अध्यक्ष ॲड. संजय पांडे, उपाध्यक्ष बजरंगलाल रांदड, सचिव मधुकर पाठक तसेच मंदिर संस्थानच्या पदाधिकाऱ्यांनी केले आहे.
