परळी प्रतिनिधी :
नागापूर गावचे माजी सरपंच तथा नागनाथ देवस्थान कमिटीचे विश्वस्त प्रभूआप्पा दिगंबर आप्पा तोंडारे यांचे अल्पशा आजाराने दुःखद निधन झाले. त्यांच्या निधनाची वार्ता परिसरात पसरताच नागापूर गावासह संपूर्ण परिसरात शोककळा पसरली असून ग्रामस्थांकडून हळहळ व्यक्त करण्यात येत आहे.
प्रभूआप्पा तोंडारे यांनी नागापूर गावाच्या सामाजिक, राजकीय आणि शैक्षणिक विकासासाठी मोठे योगदान दिले. सरपंच म्हणून कार्य करताना त्यांनी गावाच्या विकासासाठी विविध उपक्रम राबवले. सामाजिक क्षेत्रात नेहमी अग्रेसर राहून त्यांनी अनेकांना न्याय मिळवून देण्याचे काम केले. गावातील भांडण-तंटे मिटवून सामंजस्य निर्माण करण्यात त्यांचा मोठा वाटा होता.
त्यांच्या मार्गदर्शनाखाली अनेक युवक सामाजिक व राजकीय क्षेत्रात कार्यरत झाले. साधी राहणी, लोकांशी आत्मीयतेने वागण्याची शैली आणि समाजासाठी झटणारे व्यक्तिमत्व म्हणून त्यांची ओळख होती. त्यामुळेच ते नागापूर ग्रामस्थांसाठी प्रेरणादायी व्यक्तिमत्व आणि आधारस्तंभ मानले जात होते.
त्यांच्या निधनामुळे नागापूर गावाने एक आदर्श व्यक्तिमत्व, समाजभूषण आणि मार्गदर्शक गमावल्याची भावना ग्रामस्थांनी व्यक्त केली आहे.
भारतीय दलित पँथरचे परळी तालुका अध्यक्ष तथा झाशीची राणी लक्ष्मीबाई सामाजिक प्रतिष्ठान, नागापूर यांच्या वतीने प्रभूआप्पा तोंडारे यांना भावपूर्ण श्रद्धांजली अर्पण करण्यात आली असून त्यांच्या आत्म्यास शांती लाभो, अशी प्रार्थना करण्यात आली आहे.
