कोकण दर्शनमधून घडणार संगमेश्वरची खास सफर; २२ मे रोजी आकाशवाणी रत्नागिरीवर विशेष प्रसारण

रत्नागिरी प्रतिनिधी :

आकाशवाणी रत्नागिरी केंद्राच्या लोकप्रिय ‘कोकण दर्शन’ या कार्यक्रमातून यावेळी श्रोत्यांना संगमेश्वर तालुक्याची खास पर्यटन सफर अनुभवता येणार आहे. पर्यटन, संस्कृती आणि स्थानिक परंपरांचा संगम असलेला हा विशेष भाग २२ मे रोजी प्रसारित होणार असून, संगमेश्वरातील धार्मिक स्थळे, निसर्गरम्य परिसर, स्थानिक संस्कृती आणि वैशिष्ट्यपूर्ण संगमेश्वरी बोलीभाषेचा आस्वाद श्रोत्यांना घेता येणार आहे.

आकाशवाणी रत्नागिरी केंद्रावरून दर शुक्रवारी सकाळी ८.४० वाजता प्रसारित होणारा ‘कोकण दर्शन’ हा कार्यक्रम श्रोत्यांमध्ये विशेष लोकप्रिय ठरत आहे. या विशेष भागाचे लेखन सोनाली सावंत यांनी केले असून, निवेदन व निर्मिती सहाय्य सोनाली सावंत आणि वंदना मुसळे यांनी केले आहे. कार्यक्रमाचे सादरकर्ते विवेक वानखडे आहेत.

हा कार्यक्रम श्रोत्यांना 1143 KHz मध्यमलहरी वाहिनी, 101.5 MHz एफएम वाहिनी तसेच NewsOnAIR या लाईव्ह मोबाईल अ‍ॅपवर ऐकता येणार आहे. प्रसारणानंतर हा भाग AIR Ratnagiri या यूट्यूब चॅनेलवरही उपलब्ध होणार आहे.

संगमेश्वरच्या सांस्कृतिक आणि पर्यटन वैभवाची ओळख करून देणारा हा कार्यक्रम श्रोत्यांसाठी एक खास पर्वणी ठरणार असल्याची उत्सुकता व्यक्त होत आहे.