नांदेड येथे होणार पुरस्कार वितरण सोहळा
परभणी | प्रतिनिधी :
अण्णाभाऊ साठे पीपल्स फोर्सच्या वतीने प्रदान करण्यात येणारा मानाचा “छत्रपती राजर्षी शाहू महाराज समाज भूषण पुरस्कार २०२६” यंदा परभणी येथील प्रसिद्ध युवा वक्ते अॅड. संदीप दातरे यांना जाहीर करण्यात आला आहे.
शिव-शाहू-फुले-आंबेडकरी विचारसरणीच्या सामाजिक, राजकीय, आर्थिक, सांस्कृतिक आणि वैचारिक चळवळीत केलेल्या उल्लेखनीय व निःस्वार्थ योगदानाची दखल घेऊन त्यांची या पुरस्कारासाठी निवड करण्यात आल्याची माहिती पुरस्कार निवड समितीने प्रसिद्धी पत्रकाद्वारे दिली आहे.
डॉ. अण्णाभाऊ साठे पीपल्स फोर्सच्या पदाधिकाऱ्यांनी नुकतेच अॅड. संदीप दातरे यांना पुरस्कार निवडीचे अधिकृत पत्र प्रदान केले. सन्मानचिन्ह आणि सन्मानपत्र असे या पुरस्काराचे स्वरूप आहे.
छत्रपती राजर्षी शाहू महाराज यांच्या जयंतीनिमित्त आयोजित करण्यात आलेला पुरस्कार वितरण सोहळा शुक्रवार, दि. २६ जून २०२६ रोजी दुपारी १२ वाजता, सिडको, नवीन नांदेड येथे विविध मान्यवरांच्या उपस्थितीत पार पडणार आहे.
पुरस्कार निवड समितीचे प्रमुख अॅड. सुजाता पोहरे, डी. एस. वाघमारे आणि बा. रा. वाघमारे यांनी याबाबत माहिती दिली.
दरम्यान, अॅड. संदीप दातरे यांना हा प्रतिष्ठेचा पुरस्कार जाहीर झाल्यानंतर परभणी जिल्ह्यातील सामाजिक, राजकीय, कायदेशीर आणि सांस्कृतिक क्षेत्रातील मान्यवरांकडून त्यांच्यावर अभिनंदनाचा वर्षाव होत आहे. मा. नितीन रोकडे (लहुजी ब्रिगेड संस्थापक अध्यक्ष), मा. कैलास काळे (कार्याध्यक्ष), किशोर गवारे (सचिव) यांच्यासह विविध स्तरांतून त्यांचे कौतुक करण्यात येत आहे.
