खटाव प्रतिनिधी
नामदेव पाटील यांची सातारा जिल्हा काँग्रेस कमिटी च्या अध्यक्षपदी नियुक्ती करण्यात आली आहे. माजी मुख्यमंत्री पृथ्वीराज चव्हाण यांचे निकटवर्तीय म्हणून ओळख असलेल्या पाटील यांच्या नियुक्तीमुळे सातारा जिल्ह्यात काँग्रेस पक्षात नवचैतन्य निर्माण झाल्याची चर्चा सुरू आहे.
सहा महिन्यांपूर्वीच कराड दक्षिण काँग्रेस कमिटी च्या अध्यक्षपदी त्यांची नियुक्ती करण्यात आली होती. त्यानंतर स्थानिक स्वराज्य संस्थांच्या निवडणुकांमध्ये त्यांनी प्रभावी कामगिरी करत आपले राजकीय वर्चस्व सिद्ध केले.
सातारा जिल्हा परिषद आणि पंचायत समिती निवडणुकांमध्ये पत्नी सुनंदा पाटील यांना विजय मिळवून देत त्यांनी लक्ष वेधले होते. तसेच कराड पंचायत समितीवरून जगन्नाथ रवींद्र बडेकर यांना विजयी करून त्यांनी संघटनात्मक ताकद दाखवून दिली.
मागील महिन्यात पक्षाच्या केंद्रीय निरीक्षकांनी जिल्हाध्यक्ष निवडीसंदर्भात जिल्ह्यातील काँग्रेस नेते व कार्यकर्त्यांची मते जाणून घेतली होती. त्यावेळी नामदेव पाटील यांच्या नावाला मोठ्या प्रमाणात पसंती मिळाल्याचे सांगितले जाते.
नियुक्तीनंतर प्रतिक्रिया देताना नामदेव पाटील म्हणाले की, “सर्वांना सोबत घेऊन सातारा जिल्ह्यात काँग्रेस पक्ष पुन्हा बळकट करण्यासाठी प्रामाणिक प्रयत्न करणार आहे.”
