वर्धा | प्रतिनिधी
वर्धा जिल्ह्यात अंमली पदार्थ विक्री करणाऱ्या गुन्हेगारांविरोधात स्थानिक गुन्हे शाखेने धडक मोहीम राबवत मोठी कारवाई केली आहे. या कारवाईत गांजा विक्री करणाऱ्या आरोपीस रंगेहाथ पकडून मोठ्या प्रमाणात मुद्देमाल जप्त करण्यात आला.
सौरभ कुमार अग्रवाल यांनी अंमली पदार्थ बाळगणारे व विक्री करणाऱ्यांवर कठोर कारवाई करण्याचे आदेश स्थानिक गुन्हे शाखेला दिले होते. त्यानुसार दि. २२ मे २०२६ रोजी स्थानिक गुन्हे शाखेच्या पथकाला मिळालेल्या गोपनीय माहितीच्या आधारे कानगाव येथे छापा टाकण्यात आला.
पोलीस स्टेशन अल्लीपुर हद्दीतील कानगाव येथे राहणाऱ्या पुंडलिक पळसराम निमसडकर यांच्या राहत्या घरी एनडीपीएस कायद्यान्वये धाड टाकण्यात आली. यावेळी आरोपी गांजा विक्री करताना रंगेहाथ आढळून आला.
तपासादरम्यान जप्त करण्यात आलेल्या गांजाचा पुरवठा सैदु शहा (रा. इतवारा, वर्धा) याने केल्याचे निष्पन्न झाले. पोलिसांनी घटनास्थळी पंचनामा करून आरोपींकडून १ किलो १७७ ग्रॅम गांजा, गांजा विक्रीतील ४० हजार ९०० रुपये रोख रक्कम, मोबाईल फोन असा एकूण ७४ हजार ४४० रुपयांचा मुद्देमाल जप्त केला.
या प्रकरणी दोन्ही आरोपींविरुद्ध पोलीस स्टेशन अल्लीपुर येथे एनडीपीएस कायद्यान्वये गुन्हा दाखल करण्यात आला आहे.
ही कारवाई सौरभ कुमार अग्रवाल, अपर पोलीस अधीक्षक सदाशिव वाघमारे यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद चौधरी, सहाय्यक पोलीस निरीक्षक आशिषसिंग ठाकुर, पोलीस उपनिरीक्षक प्रकाश लसुंते तसेच त्यांच्या पथकाने केली.
