पारोळा | प्रतिनिधी
पारोळा शहराच्या सुरक्षेच्या दृष्टीने महत्त्वपूर्ण ठरणारी नवीन अद्यावत अग्निशमन गाडी शासनाकडून पारोळा नगरपालिका यांना प्राप्त झाली असून लोकप्रिय आमदार अमोलदादा पाटील यांच्या सातत्यपूर्ण पाठपुराव्यामुळे ही गाडी मंजूर करण्यात आली आहे.
शहरातील वाढती लोकसंख्या, विस्तारत चाललेला नागरी परिसर तसेच आपत्कालीन परिस्थितीत तातडीने मदत पोहोचविण्याची गरज लक्षात घेता ही अग्निशमन गाडी शहरासाठी मोठा दिलासा मानली जात आहे. आग लागणे, शॉर्टसर्किट, अपघात तसेच इतर आपत्कालीन घटनांमध्ये तत्काळ प्रतिसाद देण्यासाठी आधुनिक सुविधांनी सुसज्ज असलेली ही गाडी अत्यंत उपयुक्त ठरणार आहे.
यामुळे पारोळा नगरपालिका च्या अग्निशमन विभागाची कार्यक्षमता वाढण्यास मदत होणार असून नागरिकांच्या सुरक्षेला अधिक बळ मिळणार आहे. अनेक दिवसांपासून शहरासाठी अद्ययावत अग्निशमन वाहनाची मागणी नागरिकांकडून करण्यात येत होती. अखेर आमदार अमोलदादा पाटील यांच्या प्रयत्नांना यश मिळाल्याने शहरात समाधानाचे वातावरण निर्माण झाले आहे.
दरम्यान, नवीन अग्निशमन गाडीचे लोकार्पण व पूजन समारंभ आमदार अमोलदादा पाटील यांच्या संपर्क कार्यालयात त्यांच्या शुभहस्ते तसेच लोकनियुक्त नगराध्यक्ष चंद्रकांतदादा पाटील यांच्या प्रमुख उपस्थितीत उत्साहपूर्ण वातावरणात पार पडला.
यावेळी शिवसेना शहरप्रमुख तथा नगरसेवक अमृतभाऊ चौधरी, उपजिल्हाप्रमुख तथा नगरसेवक मनिषभाऊ पाटील, ज्येष्ठ पत्रकार बाळासाहेब पाटील, भूपेंद्र मराठे, विश्वास चौधरी, अभय पाटील यांच्यासह नगरपालिकेचे आजी-माजी पदाधिकारी, अग्निशमन कर्मचारी व नागरिक मोठ्या संख्येने उपस्थित होते.
नवीन अग्निशमन गाडी शहराच्या सेवेत दाखल झाल्यामुळे भविष्यात कोणत्याही आपत्कालीन परिस्थितीत अधिक वेगाने आणि प्रभावीपणे मदतकार्य राबविणे शक्य होणार असल्याची भावना उपस्थित मान्यवरांनी व्यक्त केली.
