शिरसगाव (ता. येवला, जि. नाशिक) | प्रतिनिधी
लोणारी युवा संघ (महाराष्ट्र राज्य) संचलित श्री लोमेश ऋषी सार्वजनिक वाचनालय व अभ्यासिका याचे उद्घाटन दिनांक २४ मे २०२६ रोजी शिरसगाव येथे मोठ्या उत्साहात पार पडले.
ग्रामीण भागातील विद्यार्थी, युवक-युवती आणि महिलांच्या शैक्षणिक विकासासाठी कार्य करणाऱ्या लोणारी युवा संघाच्या माध्यमातून ही दुसरी ग्रामीण अभ्यासिका सुरू करण्यात आली आहे. यापूर्वी सिन्नर तालुक्यात पहिली अभ्यासिका यशस्वीपणे सुरू करण्यात आली होती.
या उद्घाटन सोहळ्याला प्रमुख अतिथी म्हणून येवला नगरपरिषदेचे नगरसेवक श्री. दिपकभाऊ लोणारी, सरपंच श्री. ज्ञानेश्वर शेवाळे, उपसरपंच सौ. सरला बाळासाहेब बुल्हे, नायब तहसीलदार श्री. देवेंद्र कुऱ्हे, आरटीओ अधिकारी श्री. मनोज लोणकर, तसेच विविध शासकीय व सामाजिक क्षेत्रातील मान्यवर उपस्थित होते.
कार्यक्रमाचे अध्यक्षस्थान लोणारी युवा संघ (म. राज्य) चे संस्थापक अध्यक्ष श्री. विजय संवत्सरकर यांनी भूषवले.
या प्रसंगी शासकीय नोकरीत कार्यरत तसेच उद्योजक म्हणून यशस्वी झालेल्या युवक-युवतींचा मान्यवरांच्या हस्ते सत्कार करण्यात आला. त्यांना सन्मानचिन्ह व शाल देऊन गौरविण्यात आले.
तसेच इतर मागासवर्गीय महामंडळ व स्व. विष्णुपंत दादरे लोणारी आर्थिक विकास महामंडळ यांच्या वतीने मार्गदर्शन शिबिराचे आयोजन करण्यात आले. यावेळी श्री. पवन आलई यांनी उपस्थितांना विविध योजनांची माहिती दिली.
कार्यक्रमात विविध सामाजिक, शैक्षणिक व ग्रामविकास क्षेत्रातील मान्यवर उपस्थित होते. कार्यक्रमाचे प्रास्ताविक संतोष दादरे यांनी केले तर सूत्रसंचालन सुरज आढाव यांनी केले.
लोणारी युवा संघ (म. राज्य) च्या पदाधिकाऱ्यांनी या उपक्रमासाठी विशेष मेहनत घेतली असून ग्रामस्थ, सरपंच, उपसरपंच, ग्रामपंचायत सदस्य व देणगीदार यांचे आभार मानण्यात आले.
या अभ्यासिकेमुळे ग्रामीण भागातील विद्यार्थ्यांना अभ्यासासाठी प्रेरणादायी व सुसज्ज वातावरण उपलब्ध होणार असून शिक्षण क्षेत्राला नवी दिशा मिळेल, असा विश्वास व्यक्त करण्यात आला.
