पंडित दीनदयाल उपाध्याय प्रशिक्षण महाअभियानांतर्गत पदाधिकाऱ्यांची मोठी उपस्थिती
कन्नड (प्रतिनिधी)
भारतीय जनता पक्षाच्या वतीने आयोजित ‘पंडित दीनदयाल उपाध्याय प्रशिक्षण महाअभियान २०२६’ अंतर्गत छत्रपती संभाजीनगर पूर्व जिल्हा प्रशिक्षण वर्गाचा भव्य उद्घाटन सोहळा ऐतिहासिक वेरूळ नगरीत अत्यंत उत्साहात संपन्न झाला. पक्षाची विचारधारा, संघटन मजबुती आणि आगामी वाटचाल या दृष्टीने हा प्रशिक्षण वर्ग अत्यंत महत्त्वाचा मानला जात आहे.
या उद्घाटन सोहळ्याला प्रमुख मार्गदर्शक म्हणून संघटन मंत्री तथा प्रदेश उपाध्यक्ष श्री. संजयभाऊ कोडगे उपस्थित होते. आपल्या मार्गदर्शनात त्यांनी पक्ष बांधणी आणि कार्यकर्त्यांचे संघटन कौशल्य यावर विशेष भर दिला. तसेच जिल्हा प्रभारी श्री. राहुलजी लोणीकर यांनीही आगामी काळातील पक्षाच्या ध्येयधोरणांची माहिती देत कार्यकर्त्यांना सज्ज राहण्याचे आवाहन केले.
याप्रसंगी व्यासपीठावर भाजप जिल्हाध्यक्ष श्री. सुहासभाऊ सिरसाठ, माजी आमदार श्री. नरेंद्रजी पवार, माजी आमदार श्री. सांडू पाटील लोखंडे आणि भाजप जिल्हा सरचिटणीस श्री. श्रीराम बाबा शेळके यांची प्रमुख उपस्थिती होती. उपस्थित नेत्यांनी पंडित दीनदयाल उपाध्याय यांच्या प्रतिमेला पुष्पहार अर्पण करून आणि दीपप्रज्वलन करून या प्रशिक्षण वर्गाचे रीतसर उद्घाटन केले.
या प्रशिक्षण वर्गासाठी छत्रपती संभाजीनगर पूर्व जिल्ह्यातील भाजपचे सर्व प्रमुख पदाधिकारी, विविध आघाड्यांचे अध्यक्ष, स्थानिक लोकप्रतिनिधी आणि कार्यकर्ते मोठ्या संख्येने उपस्थित होते. वेरूळ येथील या शिबिरामुळे जिल्ह्यातील कार्यकर्त्यांमध्ये एक नवा उत्साह पाहायला मिळत असून, पक्ष संघटन तळागाळापर्यंत पोहोचवण्यासाठी हा वर्ग मैलाचा दगड ठरेल, असा विश्वास उपस्थित मान्यवरांनी व्यक्त केला.
