देवरुख | प्रतिनिधी
संगमेश्वर तालुक्यातील ८८ ग्रामपंचायतींच्या आगामी सार्वत्रिक निवडणुकांची तयारी वेगाने सुरू झाली असून, येत्या १२ जून रोजी सदस्य पदांच्या आरक्षणाची सोडत जाहीरपणे काढण्यात येणार आहे. त्यामुळे इच्छुक उमेदवार, राजकीय पक्ष आणि ग्रामस्थांचे लक्ष आता या प्रक्रियेकडे लागले आहे.
तालुक्यातील सर्व ग्रामपंचायत कार्यालयांमध्ये एकाचवेळी सदस्य आरक्षण सोडतीची प्रक्रिया पार पडणार असून, प्रभागनिहाय अनुसूचित जाती (एससी), अनुसूचित जमाती (एसटी), इतर मागास प्रवर्ग (ओबीसी) तसेच महिला आरक्षणानुसार जागांचे वाटप निश्चित करण्यात येणार आहे.
यापूर्वीच ग्रामपंचायतींच्या सरपंच पदांचे आरक्षण जाहीर झाले असल्याने आता सदस्य पदांच्या आरक्षणाकडे इच्छुकांचे विशेष लक्ष लागले आहे. आरक्षण निश्चित झाल्यानंतर अनेक गावांमधील संभाव्य उमेदवारांचे राजकीय गणित स्पष्ट होणार असून, निवडणुकीच्या हालचालींना आणखी वेग येण्याची शक्यता आहे.
निवडणुकांचा अधिकृत कार्यक्रम अद्याप जाहीर झालेला नसला तरी पावसाळा आणि शेतीची कामे लक्षात घेता सप्टेंबर किंवा ऑक्टोबर महिन्यात निवडणुका होण्याची शक्यता व्यक्त केली जात आहे.
आरक्षण सोडतीची तारीख जाहीर होताच संगमेश्वर तालुक्यातील राजकीय वातावरण तापू लागले आहे. गावागावांमध्ये निवडणुकांच्या चर्चांना उधाण आले असून, अनुभवी नेत्यांसह नवोदित आणि युवा इच्छुकही निवडणुकीच्या रिंगणात उतरण्यासाठी तयारी करताना दिसत आहेत.
आगामी काही दिवसांत आरक्षणाचे चित्र स्पष्ट झाल्यानंतर ग्रामपंचायत निवडणुकांची राजकीय समीकरणे अधिक स्पष्ट होणार असून, तालुक्यातील ८८ ग्रामपंचायतींमध्ये यंदा चुरशीच्या लढती पाहायला मिळण्याची शक्यता वर्तवली जात आहे.
