गडचिरोली, चामोर्शी (प्रतिनिधी) :
चामोर्शी येथे अल्पवयीन मुलीवरील अत्याचाराच्या घटनेनंतर परिसरात तीव्र संतापाची लाट उसळली आहे. या घटनेच्या निषेधार्थ १० जून रोजी शेकडो महिलांनी एकत्र येत चामोर्शी पोलीस स्टेशनवर मोर्चा काढला. आरोपीला कठोरात कठोर शिक्षा देण्यात यावी, अशी एकमुखी मागणी यावेळी करण्यात आली.
घटनेबाबत तीव्र नाराजी व्यक्त करत महिलांनी आरोपीविरोधात जोरदार घोषणाबाजी केली. “पीडितेला न्याय मिळालाच पाहिजे” आणि “आरोपीला कठोर शिक्षा झाली पाहिजे” अशा घोषणांनी पोलीस स्टेशन परिसर दणाणून गेला. मोठ्या संख्येने महिला उपस्थित राहिल्याने काही काळ परिसरात तणावपूर्ण वातावरण निर्माण झाले होते.
यावेळी पोलीस निरीक्षक दीपक डोंब यांनी उपस्थित महिलांशी संवाद साधत पोलिसांनी तत्पर कारवाई करून आरोपीला अटक केल्याची माहिती दिली. प्रकरणाचा तपास वेगाने सुरू असून लवकरात लवकर दोषारोपपत्र दाखल करण्यासाठी प्रयत्न सुरू असल्याचे त्यांनी सांगितले. तसेच हा खटला जलदगती न्यायालयात चालविण्यासाठी आवश्यक प्रक्रिया करण्यात येणार असल्याचेही त्यांनी स्पष्ट केले.
या घटनेमुळे संपूर्ण चामोर्शी तालुका हादरला असून पीडितेला न्याय मिळावा आणि भविष्यात अशा घटनांना आळा बसावा, यासाठी नागरिकांकडून कठोर कारवाईची मागणी केली जात आहे. महिलांच्या अभूतपूर्व एकजुटीमुळे या प्रकरणाकडे संपूर्ण जिल्ह्याचे लक्ष लागले आहे.
