जामखेड | प्रतिनिधी
जामखेड तालुक्यातील फक्राबाद येथील सुपुत्र तथा डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर संलग्नित योगेश्वरी महाविद्यालय, अंबाजोगाई येथील प्राणीशास्त्र विभागातील संशोधक विद्यार्थी, युवा शास्त्रज्ञ व जैवविविधता संशोधक रणजित रावसाहेब राऊत यांनी थायलंडमधील बँकॉक येथे आयोजित १० व्या आंतरराष्ट्रीय परिषदेत उल्लेखनीय यश संपादन करत दुहेरी मानाचा बहुमान मिळविला आहे.
त्यांना “एक्सलन्स इन एन्व्हायर्नमेंटल सस्टेनेबिलिटी अवॉर्ड – २०२६” (उत्कृष्ट पर्यावरणीय शाश्वतता पुरस्कार) तसेच संशोधन सादरीकरणासाठी मौखिक सादरीकरणाचे प्रथम पारितोषिक प्रदान करण्यात आले.
जागतिक पर्यावरण दिनानिमित्त ५ जून २०२६ रोजी आशियन इन्स्टिट्यूट ऑफ टेक्नॉलॉजी (AIT), बँकॉक येथे आयोजित “क्लायमेट स्मार्ट नॅचरल रिसोर्सेस मॅनेजमेंट फॉर सस्टेनेबल ॲग्रीकल्चर अँड अलाइड सायन्सेस” या आंतरराष्ट्रीय परिषदेदरम्यान हा सन्मान प्रदान करण्यात आला.
ढाका (बांगलादेश) येथील डॉ. बिनय कुमार चक्रवर्ती, रायचूरचे डॉ. रमेश राठोड, जयपूरचे डॉ. उपेंद्र सिंग, डॉ. जोगिंदर सिंग, एटीडीएस (गाझियाबाद) चे अध्यक्ष डॉ. अनंत कुमार तसेच भारतीय प्राणी सर्वेक्षण, कोलकाता येथील शास्त्रज्ञ डॉ. देवांशु गुप्ता यांच्या हस्ते रणजित राऊत यांना सन्मानचिन्ह व प्रमाणपत्र प्रदान करण्यात आले.
या परिषदेत थायलंड, बांगलादेश, नेपाळ, पाकिस्तान, श्रीलंका आणि भारतातील शास्त्रज्ञ, संशोधक, प्राध्यापक व पर्यावरण तज्ज्ञ सहभागी झाले होते. पर्यावरण संवर्धन, जैवविविधता संरक्षण, शाश्वत विकास, मानव-वन्यजीव संघर्ष अभ्यास आणि त्यावरील उपाययोजना तसेच समाजाभिमुख संशोधन क्षेत्रातील उल्लेखनीय योगदानाची दखल घेऊन रणजित राऊत यांची या प्रतिष्ठित पुरस्कारासाठी निवड करण्यात आली.
परिषदेदरम्यान त्यांनी पर्यावरण संरक्षण आणि नैसर्गिक संसाधनांच्या शाश्वत व्यवस्थापनासंदर्भातील संशोधनपर शोधनिबंध सादर केला. त्यांच्या प्रभावी संशोधन मांडणीला परीक्षकांनी सर्वोच्च मानांकन देत मौखिक सादरीकरणाचे प्रथम पारितोषिक जाहीर केले. त्यामुळे त्यांच्या संशोधन कार्याचा आंतरराष्ट्रीय स्तरावर विशेष गौरव झाला.
या कार्यक्रमास महाराष्ट्रातील विविध महाविद्यालयांतील प्राध्यापक, विभागप्रमुख व संशोधक उपस्थित होते. त्यामध्ये डॉ. टी. एस. पठाण, डॉ. पी. आर. मोरे, डॉ. अशोक मुंडे, डॉ. संतोष रणखांब, डॉ. रामहरी मायकर, डॉ. विकास कल्याणकर, डॉ. अतुल चौरपगार, डॉ. सुनिल खाडे, डॉ. यास्मिन शेख, डॉ. संगीता डोंगरे, डॉ. प्रियंका गायकवाड, डॉ. आयेशा दुर्रानी, प्राचार्य डॉ. कोलफुके आणि डॉ. कानवटे यांचा समावेश होता.
सन्मान स्वीकारल्यानंतर रणजित राऊत यांनी हा पुरस्कार आपल्या गुरुजन, संशोधन मार्गदर्शक, सहकारी आणि पर्यावरण संवर्धनासाठी कार्य करणाऱ्या सर्व घटकांना समर्पित असल्याची भावना व्यक्त केली.
त्यांच्या या उल्लेखनीय यशाबद्दल शैक्षणिक, सामाजिक, पर्यावरणीय आणि संशोधन क्षेत्रातून अभिनंदनाचा वर्षाव होत असून, या दुहेरी यशामुळे अहिल्यानगर, छत्रपती संभाजीनगर, बीड आणि अंबाजोगाईसह संपूर्ण मराठवाड्याच्या संशोधन क्षेत्राला आंतरराष्ट्रीय स्तरावर नवी ओळख मिळाल्याची भावना व्यक्त होत आहे.
