मुंबई | प्रतिनिधी
मुंबईतील पवई येथे असलेल्या श्री दुर्वाप्रिय गजानन मंदिरात पुरुषोत्तम मासाच्या पवित्र पर्वानिमित्त मंगळवार, दि. ९ जून २०२६ रोजी एकदिवसीय हरिपाठाचे आयोजन करण्यात आले होते. या भक्तिमय कार्यक्रमाला भाविकांचा उत्स्फूर्त प्रतिसाद लाभला.
या हरिपाठासाठी मुंबईतील नामांकित श्री संत मोरे माऊली स्वर साधना हरिपाठ मंडळ, घाटकोपर यांना निमंत्रित करण्यात आले होते. मंडळाचे संस्थापक अध्यक्ष अंकुश महाराज कुमठेकर (कोकणरत्न) यांच्या नेतृत्वाखाली हरिपाठ संपन्न झाला.
हरिपाठाला गायनाची साथ बाळकृष्ण महाराज अहिरे, महेश कळंबे, लक्ष्मण दाभेकर, युवराज साळुंखे आणि अमित जाधव यांनी केली. तर पखवाजाची साथ बालकलाकार सुजल संजय गोगावले, वैष्णव माऊली कळंबे आणि विघ्नेश लक्ष्मण वाडकर यांनी दिली.
या हरिपाठामध्ये लहान मुली, महिला तसेच स्थानिक महिला मंडळाच्या सदस्यांनी मोठ्या उत्साहाने सहभाग घेतला. भक्तिरसाने भरलेल्या वातावरणात उपस्थित भाविक मंत्रमुग्ध झाले. कार्यक्रमाचे विशेष आकर्षण म्हणजे संत जनाबाई यांच्या परंपरेची आठवण करून देणारा जात्यावर बसून ओव्या गाण्याचा उपक्रम. महिलांनी पारंपरिक पद्धतीने ओव्या सादर करत सांस्कृतिक वारशाचे जतन केले. हा उपक्रम नव्या पिढीसाठी प्रेरणादायी ठरला.
या कार्यक्रमाला मुंबईतील सामाजिक, शैक्षणिक, कला आणि क्रीडा क्षेत्रातील अनेक मान्यवर उपस्थित होते. कार्यक्रमाचे नियोजन मंदिराचे अध्यक्ष विलास मार्कल, उपाध्यक्ष राजेंद्र देसाई, खजिनदार उत्तम चव्हाण तसेच सचिन साळुंखे, बाळा राणे, धर्माजी वीरकर आणि मंगेश शिंदे यांनी केले.
कार्यक्रम यशस्वी करण्यासाठी तरुण मंडळाच्या कार्यकर्त्यांनी विशेष परिश्रम घेतले. शेवटी श्रींच्या आरतीने कार्यक्रमाची सांगता करण्यात आली. त्यानंतर उपस्थित भाविकांनी महाप्रसादाचा लाभ घेतला.
