वर्धा | प्रतिनिधी
वर्धा जिल्हा पोलीस दलाच्या अवैध दारूविरोधी मोहिमेला मोठे यश मिळाले असून तळेगाव पोलीस ठाण्याच्या हद्दीतील जामनेर शिवारात करण्यात आलेल्या कारवाईत ६ लाख ४५ हजार ६०० रुपयांचा मुद्देमाल जप्त करण्यात आला आहे.
१४ जून २०२६ रोजी विशेष दारूबंदी पथक, आर्वी उपविभागाला मिळालेल्या गोपनीय माहितीच्या आधारे मौजा जामनेर शिवारात छापा टाकण्यात आला. ही कारवाई आरोपी राजू बाष्टीघाट (रा. तळेगाव) यांच्या शेतात करण्यात आली.
कारवाईदरम्यान पोलिसांनी २४ लोखंडी ड्रममध्ये साठवून ठेवलेला सुमारे ४,००० लिटर मोहा सडवा तसेच गावठी हातभट्टीची दारू तयार करण्यासाठी वापरले जाणारे साहित्य जप्त केले. जप्त करण्यात आलेल्या मुद्देमालाची एकूण किंमत ६,४५,६०० रुपये असल्याचे पोलिसांनी सांगितले.
या प्रकरणी आरोपी राजू बाष्टीघाट याच्याविरुद्ध तळेगाव पोलीस ठाण्यात दारूबंदी कायद्यान्वये गुन्हा दाखल करण्यात आला असून पुढील तपास सुरू आहे.
ही कारवाई जिल्हा पोलीस अधीक्षक सौरभ कुमार अग्रवाल आणि अपर पोलीस अधीक्षक सदाशिव वाघमारे यांच्या मार्गदर्शनाखाली करण्यात आली. कारवाईत विशेष दारूबंदी पथकातील पद्माकर मुंडे, कल्पेष मगरे, राजेश, प्रतिक, शिल्पा आणि चालक सूरज भागने यांनी सहभाग घेतला.
अवैध मद्यनिर्मिती व विक्रीविरोधात जिल्हा पोलीस प्रशासनाकडून सुरू असलेल्या मोहिमेअंतर्गत ही महत्त्वपूर्ण कारवाई मानली जात असून अशा कारवाया पुढेही सुरू राहणार असल्याचे संकेत पोलिसांनी दिले आहेत.
