वर्धा | प्रतिनिधी
वर्धा जिल्हा पोलीस दलासाठी अभिमानास्पद बातमी समोर आली असून पोलीस कर्मचारी आणि राष्ट्रीय स्तरावरील व्हॉलीबॉल खेळाडू पंकज टाकोणे यांची चीनमध्ये होणाऱ्या वर्ल्ड स्कूल गेम्स चॅम्पियनशिप २०२६ साठी भारतीय व्हॉलीबॉल संघाच्या सहाय्यक प्रशिक्षकपदी निवड झाली आहे.
ही प्रतिष्ठित स्पर्धा ३० जून ते १० जुलै २०२६ या कालावधीत चीनमधील शेंगलू येथे आयोजित करण्यात येणार आहे. या स्पर्धेत भारतीय संघाच्या प्रशिक्षक मंडळात स्थान मिळवून पंकज टाकोणे यांनी वर्धा जिल्हा तसेच पोलीस दलाचा मान उंचावला आहे.
पोलीस सेवेत कार्यरत असतानाच क्रीडा क्षेत्रात सातत्यपूर्ण कामगिरी करत त्यांनी राष्ट्रीय स्तरावर विशेष ओळख निर्माण केली आहे. शिस्त, समर्पण, कठोर परिश्रम आणि खेळावरील निष्ठेच्या जोरावर त्यांनी हे यश संपादन केले आहे.
ग्रामीण भागातील अनेक होतकरू खेळाडूंना घडविण्यात आणि त्यांना राज्य व राष्ट्रीय स्तरावरील स्पर्धांपर्यंत पोहोचविण्यात त्यांचे योगदान महत्त्वपूर्ण राहिले आहे. त्यांच्या मार्गदर्शनाखाली अनेक खेळाडूंनी उल्लेखनीय यश मिळविले आहे. आता आंतरराष्ट्रीय स्तरावरील स्पर्धेत भारतीय संघाच्या प्रशिक्षक मंडळात निवड झाल्याने त्यांच्या क्रीडा कारकिर्दीत आणखी एक मानाचा अध्याय जोडला गेला आहे.
पंकज टाकोणे यांच्या या यशाबद्दल वर्धा पोलीस दलातील अधिकारी, कर्मचारी, क्रीडाप्रेमी तसेच जिल्ह्यातील नागरिकांनी त्यांचे अभिनंदन केले असून आगामी स्पर्धेसाठी शुभेच्छा दिल्या आहेत.
या यशामागे पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे तसेच वर्धा पोलीस दलाच्या क्रीडा विभागाचे प्रमुख राजेश उमरे यांचे मार्गदर्शन लाभल्याचे सांगितले जात आहे.
कर्तव्य आणि क्रीडा या दोन्ही क्षेत्रांत उत्कृष्टता साध्य करून देशाचे प्रतिनिधित्व करण्याची संधी मिळविणारे पंकज टाकोणे हे युवा पिढीसाठी प्रेरणादायी उदाहरण ठरत आहेत.
