प्रतिनिधी
दीड महिन्यांच्या उन्हाळी सुट्टीनंतर सोमवार, दि. १५ जून २०२६ रोजी राज्यभरातील शाळा पुन्हा सुरू झाल्या. यानिमित्त जिल्हा परिषद प्राथमिक शाळा, काळेवस्ती येथे नूतन विद्यार्थ्यांचा प्रवेशोत्सव मोठ्या उत्साहात साजरा करण्यात आला.
अंगणवाडीतून प्रथमच इयत्ता पहिलीत प्रवेश घेणाऱ्या विद्यार्थ्यांचे शाळेच्या वतीने जंगी स्वागत करण्यात आले. नव्या शैक्षणिक प्रवासाची आनंददायी सुरुवात व्हावी या उद्देशाने विद्यार्थ्यांना गुलाबपुष्प देऊन तसेच शालेय पाठ्यपुस्तकांचे वाटप करून त्यांचे स्वागत करण्यात आले.
शाळेचे मुख्याध्यापक अमोल नष्टे आणि शिक्षिका गोडसे मॅडम यांच्या मार्गदर्शनाखाली हा कार्यक्रम पार पडला. यावेळी पालक, ग्रामस्थ आणि शिक्षकांच्या उपस्थितीत प्रत्येक नवागत विद्यार्थ्याचे स्वागत करण्यात आले.
तसेच इयत्ता दुसरी ते चौथीच्या विद्यार्थ्यांनाही नवीन शैक्षणिक वर्षासाठी शालेय पाठ्यपुस्तकांचे वितरण करण्यात आले. विद्यार्थ्यांमध्ये नव्या वर्गात प्रवेश मिळाल्याचा उत्साह पाहायला मिळाला.
कार्यक्रमास शिवाजी शेटे, तानाजी शिंदे, राजकुमार काळे, रमेश काळे, मंगेश सोनवणे यांच्यासह पालक, ग्रामस्थ आणि शाळेतील विद्यार्थी मोठ्या संख्येने उपस्थित होते.
नवीन शैक्षणिक वर्षाच्या स्वागतासाठी आयोजित करण्यात आलेल्या या प्रवेशोत्सवामुळे शाळा परिसरात आनंददायी आणि उत्साहपूर्ण वातावरण निर्माण झाले होते.
