लातूर | प्रतिनिधी :
लातूर महानगरपालिकेने सिंगल युज प्लास्टिकविरोधातील मोहीम अधिक तीव्र करत रविवार (दि. १४ जून) रोजी गंजगोलाई परिसरात विशेष कारवाई केली. महापौर जयश्री सोनकांबळे आणि आयुक्त मानसी यांच्या निर्देशानुसार ही कारवाई करण्यात आली.
या मोहिमेदरम्यान तीन आस्थापनांवर दंडात्मक कारवाई करण्यात आली. तसेच सुमारे १० किलो सिंगल युज प्लास्टिक जप्त करण्यात आले असून संबंधितांकडून एकूण ९ हजार ३०० रुपयांचा दंड वसूल करण्यात आला.
याशिवाय सार्वजनिक ठिकाणी कचरा टाकणाऱ्या दोन नागरिकांवरही दंडात्मक कारवाई करण्यात आली. शहर स्वच्छता व पर्यावरण संवर्धनाच्या दृष्टीने महानगरपालिकेने ही मोहीम सुरू ठेवण्याचा निर्धार व्यक्त केला आहे.
कारवाईदरम्यान प्रमुख स्वच्छता निरीक्षक अक्रम शेख, स्वच्छता निरीक्षक महादेव फिस्के, प्रदीप गायकवाड, रवि शेंडगे, श्रीकांत शिंदे, निलेश शिंदे तसेच इतर कर्मचारी उपस्थित होते.
व्यावसायिकांनी आणि नागरिकांनी सिंगल युज प्लास्टिकचा वापर टाळून कापडी पिशव्यांचा वापर करावा तसेच सार्वजनिक ठिकाणी कचरा टाकू नये, असे आवाहन उपायुक्त वसुधा फड यांनी केले आहे.
