पंढरपूर प्रतिनिधी :
पंढरपूर-कुर्डूवाडी रोडवरील भाबुळगाव येथे भरधाव ट्रकच्या धडकेत एका तरुणाचा जागीच मृत्यू झाल्याची दुर्दैवी घटना घडली. या अपघातामुळे परिसरात हळहळ व्यक्त करण्यात येत आहे.
मिळालेल्या माहितीनुसार, ट्रक क्रमांक MH 26 BE 3693 आणि मोटारसायकल क्रमांक MH 13 AL 0363 यांच्यात हा अपघात झाला. अपघातात मृत्यू झालेल्या तरुणाचे नाव अंबादास बबन पाटोळे (वय 35) असे असून तो मजुरी करून कुटुंबाचा उदरनिर्वाह करत होता. त्यांच्या पश्चात पत्नी, दोन मुले तसेच आई-वडील असा परिवार आहे.
अंबादास पाटोळे हे आपल्या घराजवळून गावाकडे जात असताना भरधाव आणि ओव्हरलोड ट्रकने त्यांना धडक दिल्याची प्राथमिक माहिती आहे. धडकेनंतर ते रस्त्यावर पडले आणि ट्रकचे चाक त्यांच्या डोक्यावरून गेल्याने त्यांचा जागीच मृत्यू झाला.
अपघातानंतर ट्रक रस्त्यालगतच्या शेतात जाऊन बंद पडला. चालक मात्र घटनास्थळावरून फरार झाला असून पोलिस त्याचा शोध घेत आहेत.
घटनेची माहिती मिळताच नातेवाईकांनी घटनास्थळी धाव घेत टाहो फोडला. परिसरात मोठी गर्दी जमली होती. ग्रामीण पोलीस स्टेशनचे पोलीस निरीक्षक केशव रंधवे तसेच वाडदेकर यांनी घटनास्थळी भेट देत पंचनामा केला.
मृतदेह शवविच्छेदनासाठी ग्रामीण रुग्णालयात पाठविण्यात आला असून पुढील तपास पोलीस करत आहेत.
