लातूर | प्रतिनिधी
राष्ट्रीय परीक्षा एजेंसीमार्फत आयोजित करण्यात येणारी नीट यूजी 2026 परीक्षा रविवार, दि. 21 जून 2026 रोजी दुपारी 2 ते सायंकाळी 5 या वेळेत पार पडणार आहे. या परीक्षेच्या पार्श्वभूमीवर आवश्यक समन्वय व तक्रार निवारणासाठी लातूर जिल्हाधिकारी कार्यालयात विशेष नियंत्रण कक्ष स्थापन करण्यात आला आहे.
लातूरचे जिल्हाधिकारी डॉ. भारत बास्टवोड यांच्या निर्देशानुसार हा नियंत्रण कक्ष कार्यान्वित करण्यात आला असून, नियंत्रण कक्ष प्रमुख म्हणून तहसीलदार (संगायो) राजाभाऊ कदम यांची नियुक्ती करण्यात आली आहे. त्यांचा भ्रमणध्वनी क्रमांक ९९२२८४२००१ असा आहे.
तसेच नियंत्रण कक्ष सहाय्यक म्हणून जिल्हा परिषदेचे शिक्षण विस्तार अधिकारी मधुकर ढमाले यांची नियुक्ती करण्यात आली असून त्यांचा संपर्क क्रमांक ९४०५२८१०९८ असा आहे.
परीक्षार्थी, पालक तसेच संबंधित यंत्रणांच्या सोयीसाठी नियंत्रण कक्षाचा दूरध्वनी क्रमांक ०२३८२-२२०२०४ उपलब्ध करून देण्यात आला आहे.
परीक्षेशी संबंधित विविध विभागांमध्ये समन्वय साधण्यासाठी आरोग्य विभाग, पोलीस प्रशासन, लातूर महानगरपालिका, महावितरण, महाराष्ट्र राज्य परिवहन महामंडळ तसेच तंत्रशिक्षण संस्था अशा विविध विभागांतील एकूण ८ अधिकारी व कर्मचाऱ्यांची नियुक्ती करण्यात आली आहे.
हे अधिकारी व कर्मचारी दि. 20 आणि 21 जून 2026 रोजी सकाळी 10.30 ते सायंकाळी 5.30 या वेळेत जिल्हाधिकारी कार्यालयातील नियंत्रण कक्षात उपस्थित राहून परीक्षेसंदर्भातील तक्रारी व अडचणींचे निवारण करणार आहेत.
