लातूर : उस्मानाबाद-लातूर-बीड विधान परिषद स्थानिक स्वराज्य संस्था मतदारसंघ द्विवार्षिक निवडणुकीच्या पार्श्वभूमीवर लातूर जिल्ह्यात दोन दिवस मद्यविक्री बंद राहणार आहे. निवडणूक खुल्या, मुक्त आणि निर्भय वातावरणात पार पाडण्यासाठी तसेच जिल्ह्यात सार्वजनिक शांतता व कायदा-सुव्यवस्था अबाधित राखण्यासाठी लातूरचे जिल्हाधिकारी डॉ. भारत बास्टेवाड यांनी मद्य विक्री बंदीचे सुधारित आदेश जारी केले आहेत.
लोकप्रतिनिधित्व अधिनियम १९५१ मधील कलम १३५ (सी) आणि महाराष्ट्र दारुबंदी अधिनियम, १९४९ चे कलम १४२ (१) अन्वये देण्यात आलेल्या या आदेशानुसार, प्रत्यक्ष मतदानाच्या दिवशी गुरुवार, १८ जून २०२६ रोजी सकाळी ८ ते दुपारी ४ वाजेपर्यंत तसेच मतमोजणीच्या दिवशी सोमवार, २२ जून २०२६ रोजी मतमोजणी प्रक्रिया पूर्ण होईपर्यंत मद्यविक्री पूर्णपणे बंद ठेवण्यात येणार आहे.
हा आदेश लातूर जिल्ह्यातील मतदान व मतमोजणी होत असलेल्या सर्व संबंधित क्षेत्रांना लागू राहणार असून, यामध्ये लातूर महानगरपालिका हद्दीसह रेणापूर, अहमदपूर, जळकोट, चाकूर, उदगीर, शिरूर अनंतपाळ, देवणी, औसा आणि निलंगा या नगर पंचायत हद्दींचा समावेश आहे.
या क्षेत्रांतील सर्व देशी-विदेशी मद्याची घाऊक व किरकोळ विक्री तसेच ताडी विक्री अनुज्ञप्तीधारकांची दुकाने (एफएल-१, एफएल-२, एफएल-३, एफएल-४ क्लब अनुज्ञप्ती, सीएल-२, सीएल-३, टिओडी-३, टिडी-१ आदी) आदेशित कालावधीत पूर्णतः बंद ठेवण्याचे निर्देश देण्यात आले आहेत.
सर्व संबंधित मद्यविक्री अनुज्ञप्तीधारकांनी या आदेशाची काटेकोर अंमलबजावणी करणे बंधनकारक असून आदेशाचे उल्लंघन करणाऱ्यांवर कडक कायदेशीर कारवाई करण्यात येणार असल्याचा इशाराही प्रशासनाकडून देण्यात आला आहे. तसेच महाराष्ट्र दारुबंदी कायदा १९४९ अंतर्गत संबंधितांचा परवाना कायमस्वरूपी रद्द करण्याची कारवाईही करण्यात येऊ शकते, असे आदेशात नमूद करण्यात आले आहे.
