न्याय न मिळाल्यास भडगाव तालुक्यात तीव्र जनआंदोलन उभारण्याचा भाजपचा इशारा
भडगाव प्रतिनिधी : नसरापूर येथील चिमुकलीवरील बलात्कार आणि खून प्रकरणातील आरोपीला अवघ्या ६० दिवसांत फाशीची शिक्षा सुनावल्याबद्दल विशेष जलदगती न्यायालय तसेच महायुती सरकारचे भारतीय जनता पार्टीच्या वतीने अभिनंदन करण्यात आले. मुख्यमंत्री देवेंद्र फडणवीस आणि उपमुख्यमंत्री यांचेही यावेळी विशेष अभिनंदन करण्यात आले.
या पार्श्वभूमीवर भाजप नेते अनिल वाघ यांनी भडगाव तालुक्यात पत्रकार परिषद घेऊन गोंडगाव येथील अत्याचार प्रकरणावरून स्थानिक आमदारांच्या भूमिकेवर तीव्र टीका केली.
अनिल वाघ यांनी प्रसिद्धीपत्रकाद्वारे सांगितले की, भडगाव तालुक्यातील गोंडगाव येथे २०२३ मध्ये एका सात वर्षीय चिमुकलीवर बलात्कार करून तिचा खून करण्यात आला होता. या घटनेनंतर संपूर्ण जळगाव जिल्ह्यात संतापाची लाट उसळली होती. पीडितेला न्याय मिळावा यासाठी सर्वपक्षीय मोर्चे, आंदोलने आणि भडगाव बंदसारखे उपक्रम राबविण्यात आले होते.
त्यावेळी तत्कालीन मुख्यमंत्र्यांनी या प्रकरणासाठी जलदगती न्यायालय स्थापन करण्याचे तसेच विशेष सरकारी वकील म्हणून ॲड. उज्ज्वल निकम यांची नियुक्ती करण्याचे आश्वासन दिले होते. मात्र इतकी वर्षे उलटूनही पीडित कुटुंबाला न्याय मिळालेला नाही, असा आरोप त्यांनी केला.
अनिल वाघ म्हणाले की, “स्थानिक आमदारांनी या संवेदनशील प्रकरणाचा पाठपुरावा विधानसभेत कधीही केला नाही. उलट पत्रकारांनी प्रश्न विचारल्यानंतर त्यांच्याशी गैरवर्तन करण्यात आले. हा प्रकार अत्यंत निंदनीय आहे.”
पत्रकार परिषदेत त्यांनी काही गंभीर प्रश्न उपस्थित केले. गोंडगाव प्रकरण खरोखरच जलदगती न्यायालयात सुरू आहे का, विशेष सरकारी वकील म्हणून ॲड. उज्ज्वल निकम यांची नियुक्ती झाली आहे का, तसेच केवळ राजकीय सहानुभूती मिळवण्यासाठी जनतेची दिशाभूल केली जात आहे का, असे सवाल त्यांनी उपस्थित केले.
तसेच भोर तालुक्यातील प्रकरणात जसा समन्वय साधण्यात आला, तसा समन्वय स्थानिक आमदारांना साधता आला नाही, अशी टीकाही त्यांनी केली.
गोंडगाव प्रकरणातील पीडितेला तातडीने न्याय मिळाला नाही, तर भारतीय जनता पार्टीच्या माध्यमातून भडगाव तालुक्यात पुन्हा तीव्र जनआंदोलन उभारले जाईल, असा इशारा अनिल वाघ यांनी दिला.
यावेळी भाजप तालुकाध्यक्ष विनोद नेरकर, शेतकरी आघाडी जिल्हा सरचिटणीस सोमनाथ पाटील, हर्षल पाटील, शहराध्यक्ष निलेश पाटील, तालुका सरचिटणीस किरण शिंपी, महिला आघाडी तालुकाध्यक्षा योजना पाटील, सुशीला पाटील, शहराध्यक्षा योगिता पाटील, नगरसेवक सचिन चोरडिया, मुरली भिल्ल, चेतन पाटील, आबा महाजन, विशाल चौधरी, कुणाल पाटील आदी उपस्थित होते.
