अमरावती प्रतिनिधी :
D.D.R.F. जिल्हाधिकारी कार्यालय पथक यांनी चारगड नाल्यात बुडालेल्या व्यक्तींच्या शोध मोहिमेत मोठे यश मिळवत रविंद्र रामभाऊ आवारे यांचा मृतदेह शोधून काढला असून दुसऱ्या इसमाचा शोध अद्याप सुरू आहे.
मिळालेल्या माहितीनुसार, रविंद्र रामभाऊ आवारे (वय ५५) हे पांढरी येथील रहिवासी होते. दिनांक २९ जून २०२६ रोजी रात्री सुमारे ११.५० वाजताच्या दरम्यान चारगड नाल्यात दोन इसम बुडाल्याची माहिती जिल्हाधिकारी कार्यालयाच्या नियंत्रण कक्षाला प्राप्त झाली होती.
या घटनेची माहिती मिळताच आशिष येरेकर यांच्या आदेशानुसार तसेच निवासी उपजिल्हाधिकारी आणि जिल्हा आपत्ती व्यवस्थापन अधिकारी सुरेंद्र रामेकर यांच्या मार्गदर्शनाखाली जिल्हा शोध व बचाव पथक घटनास्थळी दाखल झाले.
३० जून रोजी सकाळी सुमारे ८.२० वाजता पथकाने शोधकार्याला सुरुवात केली. लाईफ जॅकेट, रिंग आणि हुकच्या साहाय्याने नाल्याच्या परिसरात सखोल शोधमोहीम राबविण्यात आली. अंदाजे १ ते २ किलोमीटर परिसरात शोध घेतल्यानंतर नाल्यातील कचऱ्यामध्ये रविंद्र रामभाऊ आवारे यांचा मृतदेह आढळून आला. त्यानंतर मृतदेह बाहेर काढून पुढील कारवाईसाठी पोलिसांच्या ताब्यात देण्यात आला.
दरम्यान, दुसऱ्या बेपत्ता व्यक्तीचा शोध अद्याप सुरू असून रात्री अंधार झाल्यामुळे वरिष्ठांच्या आदेशानुसार शोधकार्य तात्पुरते स्थगित करण्यात आले.
शोध व बचाव पथकातील कर्मचारी
- सचिन धरमकर
- विशाल निमकर
- कौस्तुभ वैद्य
- आकाश निमकर
- मुकेश सदाशिव
- सचिन पवार
- दीपक भोईटे
- चैतन्य पोहाणे
- गोकुळ मुंडे
- मनीष उताणे
