Miraj प्रतिनिधी :
सांगली–मिरज मार्गावरील एसटी बसमध्ये घोणस जातीचा अत्यंत विषारी साप आढळल्याने प्रवाशांमध्ये एकच खळबळ उडाली. सुदैवाने कोणालाही सापाने दंश केला नाही आणि संभाव्य मोठी दुर्घटना टळली. ही घटना शनिवारी सायंकाळी साडेसहा वाजण्याच्या सुमारास मिरजच्या शहरी बसस्थानकात घडली.
मिळालेल्या माहितीनुसार, सांगली आगाराची बस क्रमांक ५०७४ दिवसभर सांगली–मिरज मार्गावर फेऱ्या मारत होती. सायंकाळी बस मिरज बसस्थानकात पोहोचल्यानंतर प्रवासी खाली उतरत असताना एका प्रवाशाच्या नजरेस सीटखाली साप दिसला. त्यांनी तातडीने बसस्थानक नियंत्रण कक्ष आणि सुरक्षा रक्षकांना याची माहिती दिली.
यानंतर विलंब न करता सर्पमित्राला घटनास्थळी बोलावण्यात आले. सर्पमित्राने सुरक्षितपणे साप पकडल्यानंतर तो घोणस जातीचा विषारी साप असल्याचे स्पष्ट झाले. त्यानंतर सापाला सुरक्षित आणि निर्जन ठिकाणी सोडण्यात आले.
या घटनेमुळे काही काळ बसस्थानक परिसरात भीतीचे वातावरण निर्माण झाले होते. मात्र सर्पमित्राच्या तत्परतेमुळे मोठा अनर्थ टळला.
