नेर | प्रतिनिधी
नेर येथील डाकघर कार्यालयात सर्वसामान्य नागरिक, शेतकरी, महिला, ज्येष्ठ नागरिक तसेच विविध शासकीय योजनांच्या लाभार्थ्यांना मिळणाऱ्या वागणुकीबाबत तीव्र नाराजी व्यक्त केली जात आहे. कार्यालयातील काही कर्मचाऱ्यांच्या उद्धट, असहकार्यपूर्ण आणि दुर्लक्ष करणाऱ्या भूमिकेमुळे नागरिकांना मानसिक त्रास सहन करावा लागत असून वारंवार कार्यालयाचे हेलपाटे मारावे लागत असल्याच्या तक्रारी समोर येत आहेत.
नागरिकांच्या म्हणण्यानुसार, कोणतीही चौकशी करण्यासाठी गेल्यास त्यांना समाधानकारक माहिती दिली जात नाही. “आम्हाला माहिती नाही”, “ऑनलाइन नंबरवर संपर्क साधा”, “आमच्याकडे वेळ नाही” किंवा “जे होईल ते करून घ्या” अशा प्रकारची उत्तरे मिळत असल्याचा आरोप लाभार्थ्यांनी केला आहे.
ही समस्या केवळ शासकीय योजनांच्या लाभार्थ्यांपुरती मर्यादित नसून बचत खातेधारक, इंडिया पोस्ट पेमेंट बँक ग्राहक, विमाधारक महिला तसेच ज्येष्ठ नागरिकांनाही अशाच अनुभवांना सामोरे जावे लागत असल्याचे नागरिकांनी सांगितले. योग्य मार्गदर्शन न मिळाल्याने अनेक जण निराश होऊन परत जात असल्याची खंतही व्यक्त करण्यात आली.
विशेषतः वृद्ध व्यक्ती, महिला आणि शेतकऱ्यांना विविध योजनांबाबत माहिती मिळवताना मोठ्या अडचणींचा सामना करावा लागत आहे. संबंधित कर्मचाऱ्यांनी नागरिकांशी सौजन्याने व स्पष्टपणे संवाद साधून आवश्यक मार्गदर्शन करावे, अशी मागणी नागरिकांकडून करण्यात येत आहे.
दरम्यान, संबंधित वरिष्ठ अधिकाऱ्यांनी या प्रकरणाची गांभीर्याने दखल घेऊन डाकघरातील ग्राहक सेवा सुधारावी, कर्मचाऱ्यांना नागरिकांशी नम्रतेने वागण्याच्या सूचना द्याव्यात तसेच विविध योजनांची माहिती सहज उपलब्ध करून द्यावी, अशी मागणी तालुक्यातील नागरिकांनी केली आहे.
