सातारा : बोरगाव पोलिसांनी मोटारसायकल चोरीच्या गुन्ह्याचा अवघ्या पाच तासांत छडा लावत सराईत चोरट्याला अटक केली. आरोपीकडून सातारा व पुणे शहर परिसरातून चोरीस गेलेल्या एकूण १० मोटारसायकली जप्त करण्यात आल्या असून त्यांची अंदाजे किंमत ३ लाख १२ हजार रुपये आहे.
दि. २७ जून २०२६ रोजी युवराज कृष्णाजी लोहार (रा. शाहूनगर, गोडोली, सातारा) यांची होंडा CB Hornet 160R (MH-11-CF-5183) ही मोटारसायकल चोरीला गेल्याची तक्रार बोरगाव पोलीस ठाण्यात दाखल झाली होती.
गुन्ह्याचा तपास सुरू असताना बोरगाव पोलीस ठाण्याचे प्रभारी अधिकारी सहाय्यक पोलीस निरीक्षक प्रशांत हुले यांना मिळालेल्या गोपनीय माहितीनुसार तपास पथकाने आरोपीचा माग काढून रविराज ऊर्फ बबलू विलास माने (वय २५, मूळ रा. नळदुर्ग, ता. तुळजापूर, जि. धाराशिव, सध्या रा. साईनगर, बिबवेवाडी, पुणे) याला ताब्यात घेतले.
पोलीस कोठडीदरम्यान आरोपीने सातारा व पुणे शहरातील विविध पोलीस ठाण्यांच्या हद्दीत मोटारसायकल चोरीचे गुन्हे केल्याची कबुली दिली. त्यानुसार बोरगाव, मार्केट यार्ड, विश्रामबाग, स्वारगेट आणि शिवाजीनगर पोलीस ठाण्यांतील गुन्ह्यांमध्ये चोरीस गेलेल्या एकूण १० मोटारसायकली जप्त करण्यात आल्या.
सदर आरोपी हा सराईत गुन्हेगार असून यापूर्वीही पुणे शहरात त्याच्याविरुद्ध मोटारसायकल चोरीचे गुन्हे दाखल असल्याची माहिती पोलिसांनी दिली.
ही कारवाई पोलीस अधीक्षक निखिल पिंगळे, अपर पोलीस अधीक्षक डॉ. वैशाली कदम, उपविभागीय पोलीस अधिकारी विपुल पाटील यांच्या मार्गदर्शनाखाली बोरगाव पोलीस ठाण्याचे सहाय्यक पोलीस निरीक्षक प्रशांत हुले व त्यांच्या तपास पथकाने यशस्वीरीत्या पार पाडली.
