विभाग नियंत्रक डॉ. सुहास चौरे यांनी दिले सकारात्मक आश्वासन
पेण प्रतिनिधी : पुरोगामी पत्रकार संघ रायगड जिल्हाच्या वतीने के.इ.एस. लिटिल अँजेल्स स्कूल, पेण येथे एसटी बसचा ‘विनंती थांबा’ मंजूर करण्यात यावा, यासाठी विभाग नियंत्रक डॉ. सुहास चौरे यांना लेखी निवेदन देण्यात आले.
पत्रकार कैलासराजे घरत यांच्या नेतृत्वाखाली बुधवार, दि. १ जुलै २०२६ रोजी पेण रामवाडी येथील विभाग नियंत्रक कार्यालयात ही भेट घेण्यात आली. विद्यार्थ्यांच्या सुरक्षिततेचा प्रश्न लक्षात घेऊन शाळेजवळ एसटी बस थांबविण्याची मागणी यावेळी करण्यात आली.
यावर विभाग नियंत्रक डॉ. सुहास चौरे यांनी सकारात्मक प्रतिसाद देत संबंधित सर्व आगार व्यवस्थापकांना आवश्यक सूचना देण्यात येतील तसेच शाळेजवळ ‘विनंती थांबा’ फलक उभारण्यात येईल, असे आश्वासन दिले. त्यांच्या या निर्णयाबद्दल पालक वर्गातून समाधान व्यक्त करण्यात आले.
यावेळी सामाजिक कार्यकर्ते कृष्णा वर्तक, तंटामुक्ती अध्यक्ष हनुमान बाबू घरत, रुपेश देसले यांच्यासह महिला पालक मोठ्या संख्येने उपस्थित होत्या.
के.इ.एस. लिटिल अँजेल्स स्कूल या इंग्रजी माध्यमाच्या शाळेत खारपाडा, जिते, खरोशी, कोपर, दुरशेत, बळवली, गोविर्ले, इरवाडी आणि तरणखोप परिसरातील विद्यार्थी शिक्षण घेत आहेत. हे विद्यार्थी दररोज एसटी बसने प्रवास करतात. मात्र पनवेलकडून येणाऱ्या बस अंतोरा फाटा येथेच थांबत असल्याने विद्यार्थ्यांना पुढे पायी जावे लागते.
पावसाळ्यात दप्तर, रेनकोट आणि छत्री घेऊन सर्व्हिस रोडवरून चालताना विद्यार्थ्यांना मोठा त्रास सहन करावा लागत असून अपघाताचा धोकाही वाढला आहे. त्यामुळे शाळेजवळ एसटी बस थांबा मिळाल्यास विद्यार्थ्यांची गैरसोय दूर होऊन सुरक्षित प्रवासाला मदत होणार असल्याची भावना पालकांनी व्यक्त केली.
