वाशी | प्रतिनिधी
संघर्ष, जिद्द आणि कृतज्ञतेचे प्रेरणादायी उदाहरण ठरलेल्या अर्जुन दण्णे यांनी आपल्या शिक्षणाचे ऋण फेडण्याच्या भावनेतून छत्रपती शिवाजी विद्यालय, वाशी येथे १० सीलिंग फॅन भेट देत सामाजिक बांधिलकी जपली आहे.
अत्यंत प्रतिकूल परिस्थितीत शिक्षण पूर्ण केलेल्या अर्जुन दण्णे यांनी सुरुवातीला बांधकाम कामगार म्हणून काम करत कष्ट, प्रामाणिकपणा आणि चिकाटीच्या जोरावर यशस्वी कंत्राटदार व उद्योजक म्हणून स्वतःची ओळख निर्माण केली. यशाच्या शिखरावर पोहोचल्यानंतरही त्यांनी आपल्या शाळेचा विसर न पडू देता विद्यार्थ्यांच्या सोयीसाठी १० पंख्यांची भेट दिली.
या प्रसंगी शाळेचे मुख्याध्यापक, शिक्षक, कर्मचारी तसेच मान्यवर उपस्थित होते. उपस्थितांनी अर्जुन दण्णे यांच्या कार्याचे कौतुक करत त्यांच्या सामाजिक जाणिवेचे अभिनंदन केले.
यावेळी बोलताना अर्जुन दण्णे म्हणाले, “आपल्याला घडविणाऱ्या शाळेचे ऋण कधीही फेडता येत नाही. विद्यार्थ्यांना थोडीशी मदत करण्याची संधी मिळाली, हेच माझ्यासाठी मोठे समाधान आहे.”
अर्जुन दण्णे यांचा हा उपक्रम विद्यार्थ्यांसाठी प्रेरणादायी ठरत असून, समाजातील यशस्वी व्यक्तींनी आपल्या शाळा आणि समाजाप्रती कृतज्ञता व्यक्त करण्याचा आदर्श त्यांनी निर्माण केला आहे.
