शिरपूर | प्रतिनिधी
महाराष्ट्र कामगार कल्याण मंडळामार्फत प्रदान करण्यात येणारा राज्यस्तरीय आणि प्रतिष्ठेचा ‘विश्वकर्मा गुणवंत कामगार पुरस्कार २०२४’ शिरपूर येथील श्री. नरेंद्र सुरेशसिंग गिरासे यांना जाहीर झाला असून, त्यांच्या या यशामुळे शिरपूरसह धुळे जिल्हा आणि महावितरण परिवाराचा गौरव वाढला आहे.
श्री. गिरासे हे महाराष्ट्र राज्य विद्युत वितरण कंपनी मर्यादित (महावितरण) मध्ये कार्यरत असून, त्यांनी आपल्या सेवाकाळात उत्कृष्ट कार्यनिष्ठा, प्रामाणिकपणा, सुरक्षितता आणि ग्राहकसेवेचा आदर्श निर्माण केला आहे. वीज वितरण क्षेत्रातील आव्हानात्मक आणि जोखमीच्या कामांमध्ये त्यांनी जबाबदारीने कर्तव्य बजावत बिना अपघात सेवा देण्याचा उल्लेखनीय विक्रम कायम ठेवला आहे.
महावितरण ही राज्यातील कोट्यवधी ग्राहकांना सेवा देणारी देशातील अग्रगण्य वीज वितरण कंपनी असून ग्रामीण, शहरी आणि दुर्गम भागात अखंडित वीजपुरवठा करण्यासाठी अधिकारी व कर्मचारी अहोरात्र परिश्रम घेत असतात. अशा संस्थेत कार्यरत असलेल्या श्री. नरेंद्र गिरासे यांनी आपल्या उत्कृष्ट कार्यातून संपूर्ण महावितरण परिवाराचा नावलौकिक वाढविला आहे.
वीज वितरण व्यवस्थेच्या बळकटीकरणासाठी, ग्राहकांच्या तक्रारींचे तत्पर निराकरण, सुरक्षित व गुणवत्तापूर्ण कामकाज तसेच जनहिताच्या विविध उपक्रमांमध्ये त्यांनी मोलाचे योगदान दिले आहे. त्यांच्या या कार्याची दखल घेत महाराष्ट्र कामगार कल्याण मंडळाने त्यांची ‘विश्वकर्मा गुणवंत कामगार पुरस्कार’ साठी निवड केली आहे.
या सन्मानाबद्दल श्री. गिरासे यांनी महावितरणचे वरिष्ठ अधिकारी, मार्गदर्शक, सहकारी कर्मचारी, जनमित्र कर्मचारी, मित्रपरिवार, कुटुंबीय आणि हितचिंतकांचे आभार मानले आहेत. वरिष्ठांचे मार्गदर्शन, सहकाऱ्यांचे सहकार्य आणि महावितरणची कार्यसंस्कृती हेच आपल्या यशामागील प्रमुख कारण असल्याचे त्यांनी सांगितले.
सामाजिक क्षेत्रातही त्यांनी विविध लोकहिताच्या उपक्रमांमध्ये सक्रिय सहभाग घेत समाजसेवेची परंपरा जपली आहे. त्यामुळे ते केवळ आदर्श कर्मचारीच नव्हे तर समाजाभिमुख व्यक्तिमत्त्व म्हणूनही ओळखले जातात.
या पुरस्कारामुळे महावितरणच्या कार्यक्षम आणि समर्पित कर्मचाऱ्यांच्या कार्याचा गौरव झाला असून राज्यभरातून श्री. नरेंद्र गिरासे यांच्यावर अभिनंदनाचा वर्षाव होत आहे.
