महात्मा फुले कृषी विद्यापीठ, राहुरी अंतर्गत कृषी विज्ञान केंद्र, धुळे आणि लुपिन फाउंडेशन यांच्या संयुक्त विद्यमाने सांजोरी (ता. जि. धुळे) येथे एकदिवसीय शेतकरी प्रशिक्षण व आढावा बैठक उत्साहात पार पडली.
राहुरी विद्यापीठाचे कुलगुरू डॉ. विलास खर्चे यांच्या नाविन्यपूर्ण संकल्पनेतून ‘फुले समृद्ध ग्राम’ हा उपक्रम राबविण्यात येत असून, त्याअंतर्गत सांजोरी गावाची निवड करण्यात आली आहे. गाव कृषी क्षेत्रात समृद्ध आणि स्वावलंबी बनविण्याच्या उद्देशाने आयोजित करण्यात आलेल्या या कार्यक्रमाच्या अध्यक्षस्थानी महात्मा फुले कृषी विद्यापीठ, राहुरीचे विस्तार शिक्षण संचालक डॉ. गोरक्ष ससाणे हे होते.
या बैठकीत गावातील कृषी विकासाचा सविस्तर आढावा घेण्यात आला. तसेच आधुनिक शेती तंत्रज्ञान, विद्यापीठ संशोधित तंत्रज्ञानाचा अवलंब आणि शाश्वत शेती पद्धती याविषयी शेतकऱ्यांना मार्गदर्शन करण्यात आले.
कार्यक्रमास कृषी विज्ञान केंद्र, धुळे येथील वरिष्ठ शास्त्रज्ञ आणि प्रमुख डॉ. डी. आर. नांद्रे, विस्तार शिक्षण विभागाचे प्राध्यापक डॉ. पंडित खर्डे, विस्तार शिक्षण शास्त्रज्ञ डॉ. सचिन सदाफळ, मृदा शास्त्रज्ञ डॉ. अतिश पाटील, कृषी विद्या शास्त्रज्ञ श्री. जे. व्ही. कथेपुरी तसेच पशुसंवर्धन व दुग्धव्यवसाय शास्त्रज्ञ डॉ. डी. एम. चौधरी उपस्थित होते.
यावेळी माती परीक्षण, पीक व्यवस्थापन, पशुपालन, दुग्धव्यवसाय आणि पूरक व्यवसाय याबाबत सखोल मार्गदर्शन करण्यात आले. लुपिन फाउंडेशन, धुळे (कुसुंबा क्लस्टर) चे प्रकल्प अधिकारी श्री. विनोद मासुळे यांनीही ग्रामीण विकास प्रकल्पांची माहिती दिली.
या संयुक्त उपक्रमामुळे सांजोरी परिसरातील शेतीला आधुनिकतेची नवी दिशा मिळाल्याची भावना उपस्थित शेतकऱ्यांनी व्यक्त केली. भविष्यात सांजोरी गाव आदर्श ‘फुले समृद्ध ग्राम’ म्हणून विकसित होईल, असा विश्वास मान्यवरांनी व्यक्त केला.
या प्रशिक्षण व आढावा बैठकीस सांजोरी आणि परिसरातील शेतकरी, प्रगतशील बागायतदार, महिला शेतकरी तसेच ग्रामीण कृषी कार्यानुभव कार्यक्रमातील विद्यार्थिनी मोठ्या संख्येने उपस्थित होत्या.
कार्यक्रमाचे सूत्रसंचालन श्री. जगदीश काथेपुरी यांनी केले, तर आभार डॉ. धनराज चौधरी यांनी मानले. कार्यक्रमाच्या यशस्वीतेसाठी कृषी विज्ञान केंद्र, लुपिन फाउंडेशन तसेच संबंधित विभागांच्या अधिकारी-कर्मचाऱ्यांनी मोलाचे सहकार्य केले.
