नाशिक : प्रतिनिधी
निफाड तालुक्यातील गजबजलेल्या बाजारपेठेतील पालखेड मिरची येथे जिल्हा परिषद शाळा तसेच न्यू इंग्लिश स्कूल विद्यालयासमोरील रस्त्यावर तातडीने गतिरोधक बसवण्यात यावेत, अशी मागणी ग्रामस्थांसह विविध पदाधिकाऱ्यांकडून करण्यात येत आहे. मागणी मान्य न झाल्यास रास्ता रोको आंदोलन छेडण्याचा इशारा निर्भय महाराष्ट्र पार्टी चे फाउंडर मेंबर कमलाकर बिडवे यांनी दिला आहे.
पालखेड मिरची येथील जिल्हा परिषद शाळा आणि न्यू इंग्लिश स्कूल परिसरातून दररोज मोठ्या प्रमाणात विद्यार्थी तसेच नागरिकांची ये-जा सुरू असते. पिंपळगाव-लासलगाव मार्गावरील वाढती वाहतूक आणि चौफुली परिसरातील वेगवान वाहनांमुळे विद्यार्थ्यांच्या सुरक्षिततेचा प्रश्न गंभीर बनला आहे.
शाळा सुटल्यानंतर विद्यार्थ्यांना रस्ता ओलांडताना मोठा धोका निर्माण होत असल्याने या ठिकाणी गतिरोधक बसवण्याची मागणी जिल्हा परिषद शाळा आणि न्यू इंग्लिश स्कूलच्या मुख्याध्यापकांनी सार्वजनिक बांधकाम विभागाकडे वेळोवेळी निवेदनाद्वारे केली आहे. मात्र अद्याप कोणतीही कार्यवाही झालेली नसल्याची खंत व्यक्त करण्यात येत आहे.
या मागणीला ग्रामपंचायत सरपंच, उपसरपंच, ग्रामपंचायत सदस्य, दोन्ही शाळांचे मुख्याध्यापक तसेच गावातील सामाजिक कार्यकर्त्यांनी पाठिंबा दिला आहे. संबंधित विभागाने तातडीने दखल घेऊन गतिरोधक बसवावेत, अन्यथा नागरिकांच्या सुरक्षेसाठी तीव्र आंदोलन छेडण्यात येईल, असा इशारा देण्यात आला आहे.
