प्रतिनिधी / परभणी
परभणी, दि. ३ जुलै २०२६ : जिल्ह्यातील सुशिक्षित बेरोजगार युवक-युवतींना रोजगाराच्या संधी उपलब्ध करून देण्यासाठी जिल्हा कौशल्य विकास, रोजगार व उद्योजकता मार्गदर्शन केंद्र, परभणी, डीजेपी एज्युकेशनल कॅम्पस, पोहेटाकळी तसेच अखिल भारतीय श्री स्वामी समर्थ गुरुपीठ, त्र्यंबकेश्वर (दिंडोरी प्रणित) शाखा शिवाजीनगर, पाथरी यांच्या संयुक्त विद्यमाने सोमवार, दि. ६ जुलै २०२६ रोजी सकाळी ८.३० वाजता “पंडित दीनदयाळ उपाध्याय रोजगार मेळावा” आयोजित करण्यात आला आहे.
हा रोजगार मेळावा पाथरी येथील डीजेपी एज्युकेशनल कॅम्पस, पोहेटाकळी येथे पार पडणार असून महाराष्ट्र शासनाच्या कौशल्य विकास विभागामार्फत गरजू व सुशिक्षित बेरोजगारांना खाजगी क्षेत्रात रोजगाराच्या संधी उपलब्ध करून देण्याच्या उद्देशाने या उपक्रमाचे आयोजन करण्यात आले आहे.
या रोजगार मेळाव्यात राज्यातील विविध नामांकित उद्योगसमूह, कंपन्या आणि खाजगी आस्थापनांचा सहभाग राहणार आहे. दहावी, बारावी, आयटीआय, डिप्लोमा, पदवीधर आदी पात्रता असलेल्या उमेदवारांची क्षेत्र अधिकारी (SFO), क्षेत्र अधिकारी (RO), ट्रेनी ऑपरेटर, विमा सल्लागार, विमा सखी, लाईफ मित्र, ऑफिस स्टाफ आदी पदांसाठी मुलाखतीद्वारे निवड करण्यात येणार आहे.
निवड होणाऱ्या उमेदवारांना सुरुवातीला रु. १० हजार ते रु. १८ हजारांपर्यंत वेतन दिले जाणार असून अनुभव व कामगिरीनुसार वेतनवाढीची संधीही उपलब्ध राहणार आहे.
रोजगार मेळाव्यात सहभागी होण्यासाठी इच्छुक उमेदवारांनी महाराष्ट्र शासनाच्या अधिकृत संकेतस्थळावर नोंदणी करावी.
तसेच मेळाव्याच्या ठिकाणीही नाव नोंदणीची सुविधा उपलब्ध करून देण्यात आली आहे. इच्छुक उमेदवारांनी आवश्यक कागदपत्रांसह स्वखर्चाने दि. ६ जुलै रोजी सकाळी ८.३० वाजता मेळाव्याच्या ठिकाणी उपस्थित राहावे, असे आवाहन कौशल्य विकास, रोजगार व उद्योजकता विभागाचे सहाय्यक आयुक्त प्र. सो. खंदारे यांनी केले आहे.
अधिक माहितीसाठी कार्यालयीन वेळेत दूरध्वनी क्रमांक ०२४५२-२२००७४ वर संपर्क साधावा, असेही आवाहन करण्यात आले आहे.
