दोडामार्ग प्रतिनिधी
मौजे कुडासे (ता. दोडामार्ग) येथील ख्रिश्चन समाजाच्या झरे-२ कडे जाणारा रस्ता खुला करण्याच्या मागणीसाठी सुरू असलेले बेमुदत उपोषण अखेर प्रशासनाच्या सकारात्मक लेखी आश्वासनानंतर मागे घेण्यात आले आहे.
सावंतवाडीचे उपविभागीय अधिकारी वसावेकर साहेब यांनी संबंधित प्रकरणात कायदेशीर प्रक्रिया पूर्ण करण्याबाबत लेखी आश्वासन दिल्यानंतर उपोषणकर्त्यांनी आंदोलन स्थगित करण्याचा निर्णय घेतला.
प्रशासनाकडून देण्यात आलेल्या माहितीनुसार, भूसंपादन अधिनियम २०१३ अंतर्गत कलम ११ ची अधिसूचना महाराष्ट्र राज्य राजपत्रात (गॅझेट) प्रसिद्ध करण्यासाठी पाठविण्यात आली असून, त्याची प्रत लवकरच उपलब्ध करून देण्यात येणार आहे. या लेखी आश्वासनावर विश्वास ठेवत उपोषणकर्ते श्री. जॉन फ्रान्सिस डिसोजा आणि श्री. कैतान अंतोन डिसोजा यांनी प्रशासनाला पूर्ण सहकार्य करण्याची भूमिका घेतली.
या निर्णयामुळे स्थानिक परिसरात समाधानाचे वातावरण निर्माण झाले असून, रस्त्याचा प्रश्न लवकरच मार्गी लागण्याची अपेक्षा व्यक्त केली जात आहे.
यावेळी बहुजन समाज पार्टीचे महासचिव दिपक जाधव, शिवसेना (उद्धव बाळासाहेब ठाकरे) महिला तालुका प्रमुख जेनीफर लोबो, सरपंच श्रुती देसाई तसेच ग्रामपंचायत अधिकारी जनार्दन खानोलकर यांच्या मध्यस्थीने उपोषण मागे घेण्यात आले.
