निमगावजाळी प्रतिनिधी
श्रीरामपूर शहरातील पूर्णवादनगर येथे गुरुवारी झालेल्या गँगवार आणि गोळीबार प्रकरणानंतर पोलिसांनी मोठी कारवाई सुरू केली असून, स्थानिक गुन्हे शाखा (एलसीबी) पथकाने अभय ससाणे व त्याच्या साथीदारांना नाशिक येथून ताब्यात घेऊन अटक केल्याची माहिती समोर येत आहे.
अभय ससाणे व त्याचे साथीदार हे शहरातील सूतगिरणी परिसरातील टोळीशी संबंधित असल्याचे सांगितले जात असून, त्यांच्यावर खुनाचा प्रयत्नासह अनेक गंभीर गुन्हे दाखल असल्याची माहिती मिळत आहे.
या गँगवारमध्ये जखमी झालेला शुभम उर्फ कल्लू यादव (वय २०) याच्यावर सध्या नगर येथे उपचार सुरू आहेत. जखमी शुभम यादवचा संबंध श्रीरामपूर शहरातील डावखर रोड परिसरातील एका प्रमुख टोळीशी असल्याचे समजते.
दरम्यान, श्रीरामपूर शहर पोलिसांनी सोनू उर्फ जयप्रकाश बेग (रा. वॉर्ड क्रमांक ६, डावखर रोड, श्रीरामपूर) यालाही अटक केली आहे. एका गुन्ह्यात न्यायालयाने जामीन अर्ज फेटाळल्यानंतर पोलिसांचे पथक त्याच्या मागावर होते. त्यामुळे सोनू बेग याने स्वतःहून पोलीस ठाण्यात हजर होत शरणागती पत्करल्याची माहिती मिळाली आहे.
सोनू उर्फ जयप्रकाश बेग याच्यावर चोरी, बलात्कार, दरोडा, अपहरण, मारहाण यांसारख्या गंभीर स्वरूपाचे एकूण १५ गुन्हे दाखल असल्याची माहिती श्रीरामपूरचे अपर पोलीस अधीक्षक सोमनाथ वाकचौरे यांनी दिली.
दरम्यान, पोलीस अधीक्षक मुमक्का सुदर्शन यांनी श्रीरामपूरला भेट दिल्यानंतर ही विशेष धरपकड मोहीम सुरू करण्यात आली आहे. अपर पोलीस अधीक्षक सोमनाथ वाकचौरे यांच्या मार्गदर्शनाखाली पोलीस उपअधीक्षक जयदत्त भवर, श्रीरामपूर शहर पोलीस निरीक्षक खैरे आणि त्यांच्या पथकाने ही कारवाई केली असल्याचे समजते.
शहरातील वाढत्या गुन्हेगारीमुळे कायदा व सुव्यवस्थेचा प्रश्न निर्माण होत असून, नागरिकांमध्ये निर्माण झालेली भीती कमी करण्यासाठी पोलिसांकडून धडक कारवाई सुरू असल्याची माहिती पोलीस सूत्रांनी दिली.
