प्रतिनिधी | संगमनेर
अहिल्यानगर जिल्ह्याचे पोलीस अधीक्षक मुम्मका सुदर्शन यांच्या आदेशान्वये संगमनेर शहरात स्थानिक गुन्हे शाखेकडून मोठी कारवाई करण्यात आली. अवैध कत्तल व गोमांस वाहतूक प्रकरणात पोलिसांनी छापा टाकून तब्बल २ हजार किलो गोमांसासह १२ लाख रुपयांचा मुद्देमाल जप्त केला आहे.
पोलीस निरीक्षक संतोष मुटकुळे यांच्या मार्गदर्शनाखाली पोलीस उपनिरीक्षक महादेव गुट्टे, पोलीस अंमलदार गणेश लोंढे, राहुल डोके, योगेश कर्डीले, महादेव भांड तसेच महिला पोलीस अंमलदार चिमा काळे यांचे विशेष पथक तयार करण्यात आले होते. या पथकाला गोवंशीय जनावरांची अवैध कत्तल करणाऱ्यांविरोधात माहिती संकलित करून कारवाई करण्याच्या सूचना देण्यात आल्या होत्या.
पथक संगमनेर शहरात गस्त घालत असताना रेहान उर्फ जादू गुलाबनबी कुरेशी (रा. संगमनेर) व त्याचा साथीदार काशीब असद कुरेशी (रा. भारतनगर, संगमनेर) हे त्यांच्या साथीदारांच्या मदतीने सुकेवाडी रोडवरील श्रमिकनगर परिसरात, जिजामाता इंग्लिश स्कूलजवळील मोकळ्या जागेत एका पिकअप वाहनातून गोवंशीय जनावरांचे कत्तल केलेले गोमांस विक्रीसाठी वाहतूक करीत असल्याची माहिती पोलिसांना मिळाली.
या माहितीच्या आधारे पथकाने घटनास्थळी छापा टाकला. मात्र पोलिसांची चाहूल लागताच आरोपी अंधाराचा फायदा घेत घटनास्थळावरून पसार झाले. घटनास्थळी उभ्या असलेल्या पिकअप वाहनाची चौकशी केली असता ते आरोपी रेहान उर्फ जादू गुलाबनबी कुरेशी (रा. अलकानगर, संगमनेर) आणि काशीब असद कुरेशी (रा. भारतनगर, संगमनेर) यांचे असल्याचे निष्पन्न झाले.
पोलिसांनी घटनास्थळावरून सुमारे ६ लाख रुपये किमतीचे २ हजार किलो गोमांस तसेच ६ लाख रुपये किमतीची महिंद्रा बोलेरो पिकअप गाडी असा एकूण १२ लाख रुपयांचा मुद्देमाल जप्त केला आहे.
या प्रकरणी संगमनेर शहर पोलीस ठाण्यात गुन्हा रजिस्टर क्रमांक ६५४/२०२६ अन्वये गुन्हा दाखल करण्यात आला असून पुढील तपास संगमनेर शहर पोलीस करीत आहेत.
