फटाक्यांची आतषबाजी, विठ्ठल नामघोष आणि पादुकांच्या दर्शनाने परिसर भक्तिमय; जगभर विठ्ठल भक्तीचा संदेश देणाऱ्या ऐतिहासिक वारीचे उत्स्फूर्त स्वागत..
प्रतिनिधी :
युनायटेड किंगडम (यूके) येथील लंडनमधून प्रारंभ झालेली पहिली ‘लंडन ते पंढरपूर ग्लोबल वारी 2026’ अकरा देशांचा प्रवास पूर्ण करून भारतात दाखल झाली असून, पुढील प्रवासासाठी मार्गस्थ होत असताना कळंबोली- कामोठे येथे या ऐतिहासिक वारीचे २ जुलै रोजी उत्साहपूर्ण, भक्तिमय वातावरणात स्वागत करण्यात आले.
कामोठे पुलाजवळ आयोजित स्वागत सोहळ्यात विठ्ठल नामघोष, टाळ-मृदंगाचा गजर आणि फटाक्यांच्या आतषबाजीत वारकरी व नागरिकांनी वारीचे जल्लोषात स्वागत केले. विठ्ठल-रुक्मिणीच्या जयघोषात भाविकांनी पवित्र विठ्ठल पादुकांची आरती करून मनोभावे दर्शन घेतले. संपूर्ण परिसर भक्तिमय वातावरणाने भारावून गेला होता.
ही वैश्विक वारी यूके, नेदरलँड्स, जर्मनी, फ्रान्स, स्वित्झर्लंड, इटली, तुर्की, दुबई, ओमान, सिंगापूर आदी देशांचा प्रवास करत भारतात दाखल झाली आहे. जगभर वारकरी परंपरा, संत संस्कृती आणि श्री विठ्ठल भक्तीचा संदेश पोहोचविणे हा या उपक्रमाचा मुख्य उद्देश असल्याची माहिती आयोजक डॉ. अनिल खेडकर यांनी दिली.
या स्वागत सोहळ्यास कळंबोली व कामोठे परिसरातील राजकीय , सामाजिक , वारकरी, महिला, युवक आणि नागरिकांनी मोठ्या संख्येने उपस्थित राहून उत्स्फूर्त सहभाग नोंदविला.
या अनोख्या आणि ऐतिहासिक उपक्रमामुळे परिसरात भक्ती, संस्कृती आणि जागतिक एकात्मतेचा सुंदर संदेश पोहोचल्याची भावना उपस्थितांनी व्यक्त केली.
