रायगड प्रतिनिधी
भारतीय जनता पार्टी पुरस्कृत उत्तर रायगड भारतीय कामगार आघाडीची जिल्हास्तरीय बैठक कर्जत येथील फार्म हाऊसवर उत्तर रायगड जिल्हाध्यक्ष रवींद्र (रवी) नाईक यांच्या अध्यक्षतेखाली उत्साहपूर्ण वातावरणात पार पडली. संघटनेच्या बळकटीकरणासाठी ही पहिली महत्त्वपूर्ण बैठक मानली जात असून, विविध संघटनात्मक विषयांवर सविस्तर चर्चा करण्यात आली.
बैठकीत मार्गदर्शन करताना अध्यक्ष रवींद्र नाईक म्हणाले की, “कामगारांवर कुठेही अन्याय झाल्यास संघटनेच्या सर्व पदाधिकाऱ्यांनी एकजुटीने घटनास्थळी पोहोचून संबंधितांना न्याय मिळवून देण्यासाठी प्रयत्न करावेत. संघटना अधिक सक्षम व प्रभावी करण्यासाठी प्रत्येक पदाधिकाऱ्याने सक्रियपणे काम करणे आवश्यक आहे.”
या बैठकीचे संपूर्ण नियोजन उत्तर रायगड कामगार आघाडीचे उपाध्यक्ष हरेश्वरजी पोळेकर यांनी केले होते. बैठक व्यवस्था, भोजनाची उत्कृष्ट सोय तसेच उपस्थितांच्या आदरातिथ्याची चोख व्यवस्था करण्यात आली होती. त्यांच्या नियोजनाचे अध्यक्ष रवींद्र नाईक तसेच उपस्थित सर्व पदाधिकाऱ्यांनी कौतुक करून आभार मानले.
याच प्रसंगी उत्तर रायगड कामगार आघाडीचे प्रसिद्धीप्रमुख राजपाल शेगोकार यांच्या वाढदिवसानिमित्त अभिष्टचिंतन सोहळ्याचे आयोजन करण्यात आले. अध्यक्ष रवींद्र नाईक यांच्या हस्ते त्यांचा सत्कार करून वाढदिवसाच्या शुभेच्छा देण्यात आल्या.
या कार्यक्रमास रवींद्र नाईक, रवींद्र कोरडे, मधुकर उरणकर, जगदीश म्हात्रे, बाळाराम पाटील, जितेंद्र तिवारी, जगदीश परदेशी, मोहन घाडगे, निलेश वांगीलकर, श्याम भगत, उपाध्यक्ष हरेश्वरजी पोळेकर यांच्यासह संघटनेचे अनेक पदाधिकारी व कार्यकर्ते मोठ्या संख्येने उपस्थित होते.
