अलिबाग | प्रतिनिधी :
अलिबाग तालुक्यातील नवेदार कोळगाव येथील गावठाण जागेमध्ये रिलायन्स प्रकल्पाशी संबंधित वाढीव RCC बांधकाम करण्यात आल्याचे काही ग्रामस्थांच्या निदर्शनास आले. यानंतर ग्रामस्थांनी संबंधित अधिकाऱ्यांकडे पाठपुरावा करत या प्रकरणाची दखल घेण्याची मागणी केली.
ग्रामस्थांच्या म्हणण्यानुसार, या विषयावर गावकीची बैठक घेण्याचा निर्णय घेण्यात आला होता. मात्र, काही स्थानिक नेत्यांच्या विरोधामुळे बैठक होऊ शकली नसल्याचा दावा ग्रामस्थांनी केला आहे. याबाबत संबंधित नेत्यांची अधिकृत भूमिका मात्र समोर आलेली नाही.
त्यानंतर रिलायन्सचे व्यवस्थापक मनोज मिश्रा यांना गावठाण जागेवरील वाढीव RCC बांधकामाबाबत माहिती देण्यात आली. ग्रामस्थांच्या म्हणण्यानुसार, संबंधितांनी झालेली चूक मान्य करत वाढीव RCC बांधकाम हटवून जागा पूर्ववत केली.
दरम्यान, गावठाण क्षेत्रातील बांधकामे नियमानुसार होत आहेत का, याची प्रशासनाने चौकशी करून खातरजमा करावी, अशी मागणी ग्रामस्थांकडून करण्यात येत आहे.
