डम्पिंग ग्राउंडसाठी योग्य जागा निश्चित करा – भाजपा शहराध्यक्ष महेश निकम यांची मागणी
पोलादपूर | प्रतिनिधी
पोलादपूर शहरातील मध्यवर्ती ठिकाणी मोठ्या प्रमाणात कचरा टाकून तो जाळला जात असल्यामुळे परिसरात धूर व दुर्गंधी पसरत असून नागरिकांच्या आरोग्याला गंभीर धोका निर्माण होण्याची शक्यता व्यक्त होत आहे. भविष्यात श्वसनाचे तसेच इतर संसर्गजन्य आजार वाढण्याची भीतीही नागरिकांकडून व्यक्त केली जात आहे. याशिवाय परिसरात टाकण्यात येणारा प्लास्टिकयुक्त कचरा गायी खात असल्याने जनावरांच्या आरोग्यावरही विपरीत परिणाम होत असल्याचे निदर्शनास आले आहे.
या गंभीर प्रश्नाबाबत भारतीय जनता पार्टीचे पोलादपूर शहराध्यक्ष महेश निकम यांनी नगरपंचायत कार्यालयात निवेदन सादर केले.
निवेदनात शहराच्या मध्यवर्ती ठिकाणी कचरा टाकणे व कचरा जाळणे तात्काळ बंद करण्यात यावे, त्या ठिकाणी “येथे कचरा टाकण्यास व जाळण्यास सक्त मनाई आहे” असा फलक लावण्यात यावा, अशी मागणी करण्यात आली आहे. तसेच शहरासाठी योग्य डम्पिंग ग्राउंडची जागा तातडीने निश्चित करून तेथेच कचऱ्याची विल्हेवाट लावण्याची व्यवस्था करावी आणि नगरपंचायतीमार्फत नियमित कचरा संकलनाची प्रभावी यंत्रणा राबवावी, अशी मागणीही करण्यात आली.
जनहिताचा विचार करून नगरपंचायत प्रशासनाने या विषयावर तातडीने योग्य ती कार्यवाही करावी, अशी मागणी भाजपा शहराध्यक्ष महेश निकम यांनी केली.
यावेळी भाजयुमो जिल्हा उपाध्यक्ष दर्पण दरेकर यांनीही शहरासाठी कायमस्वरूपी डम्पिंग ग्राउंडची व्यवस्था लवकरात लवकर करण्यात यावी, जेणेकरून शहराच्या मध्यवर्ती भागात कचरा टाकण्याची वेळ येणार नाही, असे मत व्यक्त केले.
याप्रसंगी भाजपा शहर सरचिटणीस प्रतीक सुर्वे उपस्थित होते.
