जामखेड (प्रतिनिधी): जिल्हा परिषद प्राथमिक शाळा सारोळा येथे शनिवार, दिनांक ४ जुलै २०२६ रोजी इयत्ता आठवी शिष्यवृत्तीधारक गुणवंत विद्यार्थ्यांचा सत्कार समारंभ उत्साहात पार पडला. या कार्यक्रमास मराठा गौरव सन्माननीय युवराज (भाऊ) काशिद, सरपंच अजय (दादा) काशिद, मकरंद (आबा) काशिद तसेच केंद्रप्रमुख माजीद शेख साहेब यांची प्रमुख उपस्थिती लाभली.
यावेळी सन २०२६ च्या इयत्ता आठवी शिष्यवृत्ती परीक्षेत जिल्हा गुणवत्ता यादीत स्थान मिळवणारे सारोळा शाळेचे गुणवंत विद्यार्थी साक्षी गोवर्धन मुळे, पूनम राम जगदाळे आणि पवन दादासाहेब जगदाळे यांचा त्यांच्या पालकांसह मान्यवरांच्या हस्ते सत्कार करण्यात आला. या विद्यार्थ्यांना प्रतिवर्षी ७,५०० रुपये प्रमाणे एकूण १५,००० रुपयांची शिष्यवृत्ती मिळणार आहे.
इयत्ता आठवी शिष्यवृत्ती परीक्षेत १३ विद्यार्थ्यांपैकी ३ विद्यार्थी शिष्यवृत्तीधारक ठरले, तर NMMS परीक्षेत ११ विद्यार्थ्यांपैकी १ विद्यार्थी शिष्यवृत्तीधारक झाला. या उल्लेखनीय यशाबद्दल इयत्ता आठवीचे वर्गशिक्षक राहुल लिमकर यांचा विशेष सन्मान करण्यात आला. तसेच इयत्ता पाचवी शिष्यवृत्ती परीक्षेत १५ विद्यार्थी पात्र ठरल्याबद्दल वर्गशिक्षिका अमृता रसाळ यांनाही गौरविण्यात आले.
सारोळा शाळेचे माजी मुख्याध्यापक तथा राजुरी केंद्राचे नूतन केंद्रप्रमुख माजीद शेख साहेब यांचाही सपत्नीक सत्कार मान्यवरांच्या हस्ते करण्यात आला. उपस्थित मान्यवरांनी सारोळा शाळेच्या उत्कृष्ट शैक्षणिक गुणवत्ता पॅटर्नचे कौतुक करत शिक्षक, विद्यार्थी आणि पालकांचे अभिनंदन केले.
कार्यक्रमास शाळा व्यवस्थापन समिती अध्यक्ष सतीश मुळे, पालक गोवर्धन मुळे, राम जगदाळे, दादासाहेब जगदाळे, अंगद चव्हाण, मुख्याध्यापक संदीप भालसिंग, पदवीधर शिक्षक सुरेश बर्वे, उपाध्यापक प्रशांत होळकर, उपाध्यापिका शबाना शेख, वृषाली खांदवे, अमृता रसाळ तसेच विद्यार्थी आणि ग्रामस्थ मोठ्या संख्येने उपस्थित होते.
