पुणे | प्रतिनिधी
भारतीय हवामान विभागाने पुणे जिल्ह्यासाठी सोमवार, दि. ६ जुलै २०२६ रोजी रेड अलर्ट जारी करून मुसळधार ते अति मुसळधार पावसाचा इशारा दिल्याच्या पार्श्वभूमीवर पुणे शहर तसेच पुणे जिल्हा (ग्रामीण) येथील सर्व शाळांना सुट्टी जाहीर करण्यात आली आहे. जिल्हाधिकारी जितेंद्र डुडी यांनी यासंदर्भात अधिकृत आदेश जारी केले आहेत.
आदेशानुसार, संभाव्य अतिवृष्टी आणि विद्यार्थ्यांच्या सुरक्षिततेचा विचार करून पुणे शहर व ग्रामीण भागातील सर्व अंगणवाड्या, प्राथमिक, माध्यमिक तसेच उच्च माध्यमिक शाळांना सोमवार, दि. ६ जुलै रोजी सुट्टी राहणार आहे.
जिल्हाधिकारी कार्यालयाकडून जारी करण्यात आलेल्या आदेशात विद्यार्थ्यांच्या सुरक्षिततेला सर्वोच्च प्राधान्य देत हा निर्णय घेण्यात आल्याचे नमूद करण्यात आले आहे. मात्र, सर्व मुख्याध्यापक, शिक्षक आणि शिक्षकेत्तर कर्मचाऱ्यांनी नियमित कार्यालयीन वेळेत उपस्थित राहून स्थानिक प्रशासनाच्या सूचनांनुसार आपत्ती व्यवस्थापनाशी संबंधित कामांसाठी सज्ज राहावे, असे निर्देशही देण्यात आले आहेत.
दरम्यान, जिल्हा प्रशासनाने नागरिकांना अनावश्यक प्रवास टाळण्याचे, नदी-नाले, धबधबे तसेच पाण्याचा वेग असलेल्या धोकादायक ठिकाणी जाणे टाळण्याचे आवाहन केले आहे. तसेच भारतीय हवामान विभाग आणि प्रशासनाकडून वेळोवेळी देण्यात येणाऱ्या सूचनांचे काटेकोर पालन करण्याचे आवाहनही करण्यात आले आहे.
