पाथरगव्हाण बुद्रुक येथे एचडीपीएस कापूस व कृत्रिम बुद्धिमत्ता आधारित तूर लागवड तंत्रज्ञानाची पाहणी

प्रकल्प उपसंचालक अभिषेक घोडके यांचे शेतकऱ्यांना आधुनिक पीक व्यवस्थापनाचे मार्गदर्शन

पाथरी | प्रतिनिधी

पाथरी तालुक्यातील मौजे पाथरगव्हाण बुद्रुक येथे सघन कापूस लागवड (HDPS) तंत्रज्ञान तसेच कृत्रिम बुद्धिमत्ता (AI) आधारित तूर लागवड तंत्रज्ञानाच्या प्रात्यक्षिक क्षेत्राची प्रकल्प उपसंचालक (आत्मा) परभणी श्री. अभिषेक घोडके यांनी प्रत्यक्ष भेट देऊन पाहणी केली. आधुनिक कृषी तंत्रज्ञानाच्या माध्यमातून उत्पादनवाढ, खर्चात बचत आणि शाश्वत शेतीसाठी आवश्यक उपाययोजनांबाबत यावेळी शेतकऱ्यांना मार्गदर्शन करण्यात आले.

श्री. गणेश घांडगे व श्री. बळीराम घांडगे यांच्या शेतामध्ये उभारण्यात आलेल्या सघन कापूस लागवड (HDPS) तसेच कृत्रिम बुद्धिमत्ता आधारित तूर लागवड प्रात्यक्षिकांची पाहणी करताना तालुका कृषी अधिकारी श्री. गोविंद कोल्हे यांनी आधुनिक लागवड पद्धती, कृत्रिम बुद्धिमत्तेच्या साहाय्याने पीक निरीक्षण, अचूक व्यवस्थापन आणि त्यातून होणारे फायदे याबाबत सविस्तर माहिती दिली.

यावेळी प्रकल्प उपसंचालक श्री. अभिषेक घोडके यांनी पीक व्यवस्थापन, कीड व रोग नियंत्रण, अन्नद्रव्य व्यवस्थापन, योग्य सिंचन पद्धती आणि उत्पादनवाढीसाठी आवश्यक तांत्रिक बाबींवर मार्गदर्शन केले. बदलत्या हवामानाच्या पार्श्वभूमीवर आधुनिक तंत्रज्ञानाचा स्वीकार करून शेती अधिक उत्पादक, किफायतशीर आणि शाश्वत करण्याची गरज त्यांनी अधोरेखित केली. तसेच कृषी विभागाच्या विविध योजनांचा लाभ घेऊन नवीन तंत्रज्ञान आत्मसात करण्याचे आवाहनही त्यांनी शेतकऱ्यांना केले.

या पाहणी दौऱ्याला मंडळ कृषी अधिकारी श्री. पांडुरंग गोरे, उपकृषी अधिकारी श्री. बी. यू. शिंदे, सहाय्यक कृषी अधिकारी श्री. ओंकार लबडे, बीटीएम श्री. रमेश इक्कर, बीटीएम श्री. विशाल दलाल तसेच एटीएम श्री. रमेश शिरस उपस्थित होते. याशिवाय श्री. कोंडीराम घांडगे, श्री. दिनेश घांडगे आणि परिसरातील अनेक शेतकरी मोठ्या संख्येने उपस्थित राहून आधुनिक कृषी तंत्रज्ञानाविषयी माहिती घेतली.