कर्जत, रायगड : कर्जत तालुक्यातील पळसदरी येथील ठाकूरवाडी परिसरात मुसळधार पावसामुळे दरड कोसळल्याची घटना घडली. या दुर्घटनेत कोणतीही जीवितहानी झाली नसल्याने मोठा अनर्थ टळला आहे.
दरड कोसळल्यामुळे संबंधित घर पूर्णपणे मातीच्या ढिगाऱ्याखाली दबले गेले असून घरासमोर उभ्या असलेल्या दोन गाड्याही मातीखाली अडकल्या आहेत. अचानक घडलेल्या या घटनेमुळे परिसरात भीतीचे वातावरण निर्माण झाले असून स्थानिक नागरिकांनी तत्काळ घटनास्थळी धाव घेत मदतकार्य सुरू केले.
घटनेची माहिती मिळताच प्रशासन आणि संबंधित यंत्रणा घटनास्थळी दाखल झाल्या असून पंचनामा करण्याचे काम सुरू आहे. तसेच झालेल्या नुकसानीचा अंदाज घेतला जात आहे.
दरम्यान, जिल्ह्यात सुरू असलेल्या मुसळधार पावसाच्या पार्श्वभूमीवर डोंगराळ व दरडप्रवण भागातील नागरिकांनी सतर्क राहावे तसेच प्रशासनाच्या सूचनांचे पालन करावे, असे आवाहन प्रशासनाकडून करण्यात आले आहे.
