कन्नड | प्रतिनिधी
कन्नड तालुक्यातील सायगव्हाण येथील मदिरा बिअर बारमध्ये अज्ञात चोरट्यांनी धाडसी चोरी करत सीसीटीव्हीचा डीव्हीआर आणि मद्याच्या विविध ब्रँडच्या बाटल्यांसह एकूण ७४ हजार ३०० रुपयांचा ऐवज लंपास केल्याची घटना उघडकीस आली आहे.
याप्रकरणी बारचालक जयवंत मदन पाटील (वय ४९, रा. सायगव्हाण) यांनी कन्नड ग्रामीण पोलीस ठाण्यात फिर्याद दाखल केली आहे.
फिर्यादीनुसार, रविवार (५ जुलै) रात्री साडेनऊ ते सोमवार (६ जुलै) सकाळी नऊ वाजेच्या दरम्यान अज्ञात चोरट्यांनी बार आणि गोडाऊनचे कुलूप तोडून आत प्रवेश केला. चोरट्यांनी मॅकडोल, ओसी ब्ल्यू, आरएस, आरसी (रॉयल चॅलेंज), किंगफिशर आणि ट्यूबर्ग कंपनीच्या मद्याच्या बाटल्यांचे बॉक्स तसेच सीसीटीव्ही यंत्रणेचा डीव्हीआर चोरी करून नेला.
चोरट्यांनी पुरावे नष्ट करण्याच्या उद्देशाने सीसीटीव्हीचा डीव्हीआरही सोबत नेल्याची शक्यता व्यक्त केली जात आहे.
या प्रकरणी कन्नड ग्रामीण पोलीस ठाण्यात अज्ञात आरोपींविरुद्ध गुन्हा दाखल करण्यात आला असून, सहायक पोलीस निरीक्षक नारायण गिते यांच्या मार्गदर्शनाखाली पोलीस नाईक प्रदीप पवार पुढील तपास करत आहेत.
