उमरखेड | प्रतिनिधी :
रिपब्लिकन सेनेच्या विदर्भ कमिटीने आगामी निवडणुका आणि संघटन बांधणीच्या पार्श्वभूमीवर महत्त्वपूर्ण फेरबदल करत रिपब्लिकन युवा सेनेचे यवतमाळ जिल्हाध्यक्ष सुनील पाटील चिंचोलकर यांची यवतमाळ–वाशीम लोकसभा अध्यक्षपदी नियुक्ती केली आहे.
राष्ट्रीय अध्यक्ष आनंदराज आंबेडकर यांच्या आदेशानुसार, प्रदेशाध्यक्ष डॉ. सुशील सूर्यवंशी यांच्या सूचनेवरून आणि युवा प्रदेशाध्यक्ष किरण घोंगडे यांच्या मार्गदर्शनाखाली नागपूर येथील विदर्भ कार्यालयात हा नियुक्ती सोहळा पार पडला. विदर्भ अध्यक्ष प्रफुल शेंडे यांच्या हस्ते चिंचोलकर यांना नियुक्तीपत्र प्रदान करण्यात आले. यावेळी प्रभारी विदर्भ अध्यक्ष योगेंद्र चवरे, विदर्भ सचिव अमोल कुमार आणि राजेश मेश्राम यांची प्रमुख उपस्थिती होती.
राज्यभर सुरू असलेल्या ‘संघटन सृजन मोहिमे’ अंतर्गत पक्षाची संघटनात्मक ताकद वाढविणे, नव्या कार्यकर्त्यांना पक्षाशी जोडणे आणि आगामी निवडणुकांसाठी सक्षम नेतृत्व तयार करणे हा मुख्य उद्देश असल्याचे पक्षाकडून सांगण्यात आले.
नियुक्तीनंतर बोलताना सुनील पाटील चिंचोलकर यांनी वरिष्ठ नेते, प्रदेश व विदर्भ कमिटी तसेच पदाधिकारी आणि कार्यकर्त्यांचे आभार मानले. यवतमाळ–वाशीम लोकसभा क्षेत्रात पक्षाची संघटना अधिक मजबूत करण्यासाठी ‘रिपब्लिकन सेना संवाद दौरा’, सदस्य नोंदणी मोहीम आणि युवकांना पक्षाच्या मुख्य प्रवाहात आणण्यासाठी विविध उपक्रम राबविण्यात येणार असल्याचे त्यांनी सांगितले.
तसेच जिल्हा परिषद, पंचायत समिती निवडणुकांच्या पार्श्वभूमीवर नियोजनबद्ध रणनीती आखली जाणार असून, स्थानिक नागरी समस्या, शेतकरी, कामगार आणि विद्यार्थ्यांच्या प्रश्नांवर प्राधान्याने काम केले जाईल, असेही त्यांनी स्पष्ट केले.
या नियुक्तीमुळे यवतमाळ आणि वाशीम जिल्ह्यातील रिपब्लिकन सेनेच्या कार्यकर्त्यांमध्ये उत्साहाचे वातावरण निर्माण झाले असून, पदाधिकारी व कार्यकर्त्यांकडून चिंचोलकर यांचे अभिनंदन करण्यात येत आहे. यावेळी गौतम नवसागरे, शुद्धोधन दिवेकर, सतीश खिल्लारे, संदीप राऊत यांच्यासह अनेक पदाधिकारी उपस्थित होते.
